АСО: Бројот на претставки решени во корист на осигуреници зголемен 2,5 пати
Една од најособените, од вкупно 206, претставки што ги доби АСО е таа во која на осигуреник не му беше продолжено осигурувањето поради тоа што во меѓувреме му бил дијагностициран рак. АСО ги соочи двете осигурителни компании (од кои едната го предава, а другата го превзема осигуреникот) и ги разгледа условите и аргументите на трите страни. Случајот беше решен позитивно. При што двете компании се усогласија, а осигуреникот доби полиса за животно осигурување која го обезбедува кредитот
Агенцијата за супервизија на осигурување (АСО) доби 206 претставки од незадоволни осигуреници за работата на осигурителни компании и други учесници на пазарот во 2021 година. Бројот на претставки од осигуреници лани е зголемен за 2,4 пати во споредба со 2020 година, покажуваат официјалните податоци на АСО.
Во овој период АСО, врз основа на претставки примени од незадоволни осигуреници, на три осигурителни друштва им изрече четири мерки од кои две се парични глоби.
Осигуреници минатата година поднеле претставки за 18 учесници на осигурителниот пазар, а кај 16 од нив бројот на поднесени жалби е поголем во споредба во 2020 година.
АСО реши 42 претставки во корист на осигурениците во 2021 година. Во однос на претходната година бројот на претставки решени во корист на осигуреници е поголем за 2,5 пати. Од сите поднесени претставки за 22 е утврдено дека се поднесени без основ, 12 се повлечени од подносителите, а 13 се во процес на постапување. Во корист на учесниците на осигурителниот пазар (компании, осигурителни брокери и други) се решени 65 претставки.
Најчесто, поточно во 79 случаи, осигурениците се жалеле на основот на кој се исплатуваат штети кои биле покриени со договори за осигурување. За висината на износот што осигурителните компании го понудиле за исплата на штета се пожалиле 52 осигуреници. Во овие случаи АСО нема надлежност да одлучува за висината на надоместокот, но ги утврдува условите и околностите. За роковите за обработка на штети се поднесени 16 претставки, а за рокот на исплата на штетата се жалеле 8 осигуреници. По други основи се поднесени уште 25 претставки.
Во 161 случај подносители на претставки се физички лица, а 39 претставки поднеле правни лица.
Најголем број претставки – 91 се поднесени за осигурани случаи од класата автоодговорност. За осигурување од незгода се поднесени 31 претставка, а за класата имот 21. За животно осигурување се поднесени 15 претставки, за приватно здравствено осигурување се поднесени 6 претставки. За другите осигурителни класи се поднесени 14 претставки.
Претставка до АСО се поднесува ако осигуреникот не е задоволен од одговорот на осигурителната компанија за оштетното побарување или не добил одговор во рок од 30 дена. АСО не разледува анонимни претставки или случаи за кои се води судска или друга постапка.
Агенцијата за супервизија на осигурување (АСО) е независно регулаторно тело кое го регулира пазарот за осигурување, врши надзор над работата на осигурителните субјекти, се грижи за заштита на правата на осигурениците и придонесува за финансиска едукација и вклученост на населението.
Седница одржана на 22.03.2022
- Записникот од шеста седница на СнЕ на АСО во 2022 година, одржана на ден 10.3.2022 година во 12:30;
- Одлука за Друштвото за осигурување ХАЛК ОСИГУРУВАЊЕ АД Скопје со записник за прекршочен налог,
- Барање за продолжување на полагање на стручен испит за застапник во осигурување за лицето Филип Костадиновски и донесување на Решение за продолжување на стручен испит,
- Барање за продолжување на полагање на стручен испит за застапник во осигурување за лицето Глигор Јовески и донесување на Решение за продолжување на стручен испит,
- Барање за продолжување на полагање на стручен испит за застапник во осигурување за лицето Јелисавета Георгиева Јовеска и донесување на Решение за продолжување на стручен испит,
- Одлучување по известување за раскинување на договор за застапување во осигурување со лицето Дарко Костески и донесување на Решение за одземање на лиценца за застапник во осигурување,
- Одлучување по известување за раскинување на договор за застапување во осигурување со лицето Милена Величковиќ и донесување на Решение за одземање на лиценца за застапник во осигурување,,
- Барање за добивање согласност за член на орган на управување на ТРИГЛАВ осигурување за лицето Војдан Јорданов и донесување на Решение за давање на согласност,
- Извештај од спроведениот испит по предемтот Актуарска математика 1 – едукатор Тихана Радишиќ.
Од 21-27 март, 2022 година ќе се одбележи десеттото издание на Глобалната недела на пари
На светско ниво, Глобалната недела на пари се одбележува од 2012 година, со единствен прекин во 2020 година заради пандемијата, при што од 2021 година се одржува во организација на ОЕЦД. Оваа глобална иницијатива, којашто досега се одбележува во повеќе од 175 земји во светот, ја подигнува свеста кај младите за финансиската едукација и ги зголемува нивните знаења за парите, штедењето, вработувањето и претприемаштвото. Секоја година, младите луѓе разговараат, читаат и учат за економските и за финансиските системи преку најразлични активности што ги спроведуваат финансиските, државните и образовните институции. Целта на Глобалната недела на парите е да ги поттикне младите да инвестираат во својата иднина, истакнувајќи ја важноста на финансиската писменост и едукација, со што ќе се помогне тие да станат свесни за своите финансиски права, ќе им се олесни пристапноста до финансиските услуги и ќе се развијат нивните финансиски вештини.
Финасиската едукација е составен дел од мисијата на АСО и традиционално, и оваа година ќе се вклучиме во прославување на Глобалната недела на пари и ќе ја промовираме финансиската писменост во нашата земја преку настани, публикации и партнерства. Сите активности се во насока да ја подобрат финансиската писменост преку подобра финансиска едукација.
Агенцијата ќе земе учество преку бројни активности на повеќе нивоа: промовирање на корисни содржини и давање совети на осигурениците преку порталот за едукација со акцент за заштита на нивните права и интереси, споделување на корисни и навремени информации преку интернет страната и социјалните мрежи, едукативни прашалници, анкети, организирање квиз, едукативни онлине предавања, ТВ настапи, промоција на добрите практики во доменот на финансиската едукација и финасиската инклузија, промовирање на улогата на друштвата за осигурување и посредниците во осигурување во финансиската едукација со цел да стане дел од нивното добро работење во однос на нивните финансиски клиенти, поттикнување на отчетноста и одговорноста на друштвата за осигурување и посредниците во осигурување, не само во обезбедувањето информации и совети за финансиски прашања, туку и во промовирањето на финансиската свест на клиентите.
Ова е одлична можност со свои активности и идеи да се вклучат субјектите на пазарот на осигурување!
- https://globalmoneyweek.org/regions/mena/11-partners.html
- https://edukacija.aso.mk/%d1%84%d0%b8%d0%bd%d0%b0%d0%bd%d1%81%d0%b8%d1%81%d0%ba%d0%b0-%d0%b5%d0%b4%d1%83%d0%ba%d0%b0%d1%86%d0%b8%d1%98%d0%b0/
- https://www.globalmoneyweek.org/gmw2022-launch.html
Не заборавајте да ги следите профилите на АСО на социјалните мрежи (Facebook, LinkedIn, Instagram)
НБО и АСО: Бегалците од Украина ослободени од плаќање гранично осигурување
Националното биро за осигурување (НБО) од својот гарантен фонд ќе ги покрие сите евентуални штети од украински возила што превезуваат бегалци до 30 јуни годинава. Одлуката ја донесоа со консензус сите 11 компании за неживотно осигурување
Сите лица со статус на бегалци од Украина на влез во нашата земја ќе бидат ослободени од плаќање на гранично осигурување. Оваа одлука ја донесе Националното биро за осигурување (НБО) во координација со Агенцијата за супервизија на осигурување (АСО) на иницијатива добиена од Владата.
– Со оглед на актуелната бегалска криза предизвикана од воениот конфликт во Украина и појавата на бегалци на нашата граница се создаде неопходна потребна од изнаоѓање општоприфатливо и системски засновано решение за прием на возила со бегалци кои немаат зелена карта и не се во можност да купат гранично осигурување. Успеавме да обезбедиме издржано решение во рамки на можностите и согласно со надлежностите и условите. Во оваа ситуација за посебно истакнување е хуманиот пристап, ажурноста и ангажманот на сите 11 друштва за осигурување. Искрено веруваме и се надеваме дека разумот ќе надвладее, а мирот ќе завладее и лицата со статус бегалци набрзо ќе се вратат во својата земја, истакна д-р Крсте Шајноски, претседател на Советот на експерти на АСО.
Одлуката на НБО важи за сите возила со украински регистарски таблички кои превезуваат лица со статус на бегалци од Украина без разлика дали возилата ќе транзитираат низ македонска територија или ќе останат во нашата земја. Одлуката на НБО ќе важи до 30 јуни годинава.
При носењето на одлуката НБО, во координација со АСО, се водеше од универзалните начела за солидарност и пружање помош за бегалци од воени подрачја.
-Ова е наш придонес со кој им посакуваме добродојде на лицата од Украина со статус на бегалци. Со овој чекор веруваме дека макар и малку ќе придонесеме за олеснување на нивната моментална положба. Сите членки на НБО покажаа исклучително силна солидарност и единство во барањето и наоѓање на решение со кое требаше заеднички да придонесеме во ублажување на тешката состојба во која се наоѓаат овие лица со статус на бегалци , потенцираше Трајче Латиновски, директор на НБО.
Оваа одлука беше донесена со консензус на сите 11 осигурителни компании за неживотно осигурување кои работат на македонскиот пазар за осигурување. Одлуката на Управниот одбор на НБО ја поддржаа: „Триглав Осигурување“, „Евроинс Осигурување“, „Сава Осигурување“, „Кроација осигурување – неживот“, АДОР „Македонија ВИГ“, „Осигурителна полиса“, „Винер ВИГ“, „Еуролинк“, „Граве неживот“, „Уника“ и „Халк осигурување“.
Управниот одбор на НБО одлучи од својот Гарантен фонд да ги надомести сите евентуални штети во сообраќајот што би ги предизвикале тие возила во земјава.
Со оваа одлука осигурителните компании, НБО и АСО приклучувајќи се на иницијативата од Владата, во рамки на надлежностите и можностите, дадоа свој придонес за ублажување на состојбата на лицата бегалци од Украина.
АСО: Осигурителните друштва добивката за 2021 година да ја вложат во дејноста осигурување или да ја чуваат во резерви
Добивките на осигурителните компании за 2019 и за 2020 година компаниите можат да ги користат и за исплата на дивиденда, препорачува АСО
Агенцијата за супервизија на осигурување (АСО) им препорача на сите осигурителни компании да се воздржат од исплата на дивиденда за успешното работење во 2021 година, одлучи Советот на експерти (раководен орган) на АСО на последната седница одржана на 10 март.
АСО препорачува на сите осигурителни друштва кои минатата година ја завршиле со добивка тие средства да ги искористат за реинвестирање во дејноста осигурување или за зголемување на резервите на друштвата.
Воедно АСО препорачува, на компаниите кои планирале исплата на дивиденда на акционерите, тие средства да ги задржат и евентуално искористат за покривање на непредвидени и неочекувани обврски од работењето до крајот на 2022 година.
Оваа препорака АСО ја донесе врз основа на проценката на ризиците поврзани со моменталното економско опкружување и можните ефекти врз работењето односно ликвидноста, солвентноста и капиталната адекватност на друштвата за осигурување.
Од вкупно 16 друштва за осигурување минатата година со добивка од работењето ја завршиле десет осигурителни компании. Меѓу нив шест друштва се за неживотно осигурување, а четири се компании за осигурување живот.
Агенцијата за супервизија на осигурување (АСО) е независно регулаторно тело кое го регулира пазарот за осигурување, врши надзор над работата на осигурителните субјекти, се грижи за заштита на правата на осигурениците и придонесува за финансиска едукација и вклученост на населението.
Седница одржана на 10.03.2022
- Записник од петта седница на СнЕ на АСО во 2022 година, одржана на ден 24.2.2022 година во 11:00;
- Одлука за изрекување мерки на супервизија кон Друштвото за осигурување ХАЛК ОСИГУРУВАЊЕ АД Скопје,
- Решение за изрекување дополнителни мерки кон Друштвото за осигурување ХАЛК ОСИГУРУВАЊЕ АД Скопје,
- Барање за добивање согласност за стекнување квалификувано учество во Осигурително брокерското друштво СН ОСИГУРИТEЛЕН БРОКЕР АД Битола од страна на лицето Зоран Пејчиновски и донесување на Решение за издавање на согласност за стекнување на квалификувано учество во осигурително брокерско друштво,
- Барање за добивање согласност за стекнување квалификувано учество во Осигурително брокерското друштво СН ОСИГУРИТEЛЕН БРОКЕР АД Битола од страна на лицето Христо Кондовски и донесување на Решение за издавање на согласност за стекнување на квалификувано учество во осигурително брокерско друштво,
- Разгледување на моменталното економско опкружување и можните ефекти врз работењето на друштвата за осигурување.
Комитет за финансиска стабилност: Осигурителниот пазар порасна 15%, финансиската и стабилноста на курсот на денарот успешно се одржуваат
Скопје, 9 март 2022
Осигурителниот пазар во 2021 година порасна за 15%, а развојот на настаните во Украина не се одразуваат неповолно врз осигурителниот пазар. Затоа што во поглед на управувањето со ризиците, ниту на страната на обврските, ниту на страната на средствата не сме изложени директно на ризици од Украина, потенцираше д-р Крсте Шајноски, претседател на Советот на експерти на АСО на редовната седница на Комитетот за финансиска стабилност на кој учествуваа високи претставници на регулаторните тела од финансискиот систем ина Министерството за финансии.
„Тоа што е уште побитно е што друштвата за осигурување располагаат со капитал којшто е повисок за четирипати од потребниот износ на маргината на солвентност, што ја потврдува високата солвентност на пазарните субјекти. Конзервативните политики и регулативата за вреднување на техничките резерви и вложувањата на средствата, како и високиот квалитет на инструментите коишто се вклучени во пресметката на капиталот на друштвата за осигурување, се добра основа и гаранција за зачувувањето на солвентноста. Растот на бруто полисираната премија предизвика раст и на расходната страна, односно раст на исплатите на штетите и на оперативните трошоци. Ова придонесува за влошување на финансиските остварувања. Развојот на настаните во Украина не се одразуваат неповолно врз осигурителниот пазар, затоа што во поглед на управувањето со ризиците, ниту на страната на обврските, ниту на страната на средствата не сме изложени директно на ризици од Украина“, посочува Шајноски.
Гарантирана е стабилноста на курсот на денарот. Финансискиот систем исто така е стабилен и е подготвен да им одговори на предизвиците што би можеле да произлезат од руско-украинскиот конфликт, исто како што и во целиот пандемичен период успешно се справува со ризиците. Сите финансиски услуги непречено се обезбедуваат и ќе се обезбедуваат и натаму, во согласност со потребите на граѓаните и на корпоративниот сектор. Надлежните регулатори координирано ги следат состојбите и се подготвени брзо да делуваат, да ги приспособуваат политиките во согласност со случувањата и да ја одржат финансиската стабилност, којашто е приоритет.
Ова се дел од констатациите од денешната седница на Комитетот за финансиска стабилност, на којашто се разгледаа најновите движења во финансискиот сектор во контекст на актуелните геополитички случувања, поврзани со воениот конфликт во Украина. Со седницата претседаваше гувернерката на Народната банка, Анита Ангеловска-Бежоска, а учествуваа и министерот за финансии, Фатмир Бесими, претседателката на Комисијата за хартии од вредност (КХВ), Нора Алити, претседателот на Советот на експерти на Агенцијата за супервизија на капитално финансирано пензиско осигурување (МАПАС), Максуд Али и претседателот на Советот на експерти на Агенцијата за супервизија на осигурување (АСО), Крсте Шајноски.
На седницата беше посочено дека од самиот почеток на руско-украинскиот конфликт, состојбите внимателно се следат и постојано се оценуваат. Бидејќи се работи за неекономски шок, чијшто иден развој тешко може да се предвиди, прерано е да се извлечат заклучоци за долгорочните влијанија врз домашната економија. Сепак, она што е извесно е дека досега нема поизразени директни влијанија врз домашниот финансиски сектор и не се ни очекуваат, што се должи на многу слабите финансиски врски со Русија и Украина. Дополнителен фактор е отсуството на капитал од овие две земји во домашниот банкарски сектор. Ова е важна предност во овие околности, особено ако се земат предвид предизвиците со кои се соочија некои од соседните земји во кои беа присутни руски банки.
Гувернерката Ангеловска-Бежоска посочи дека девизните резерви се на високо ниво, што ја гарантира стабилноста на денарот, додека домашниот банкарски сектор е сигурен, ликвиден и соодветно капитализиран, подготвен за справување со евентуалните шокови.
„За време на корона-кризата банкарскиот сектор покажа дека умее да ги ублажува ризиците, дури и кога тие се нови и дотогаш невидени, како по размер, така и по карактеристики. Банкарскиот сектор покажа дека е способен да ја поддржи економијата и во сложени услови и да им одговори на барањата на граѓаните и на корпоративниот сектор. Според сите показатели, ваквите капацитети се задржани и дополнително се зајакнати во овој период.“ ‒ посочи гувернерката Ангеловска-Бежоска.
Таа додаде дека потврда за соодветните политики е и одлуката на ЕК, со која се оценува дека банкарската регулатива и супервизијата коишто ги спроведува Народната банка се во согласност со стандардите на ЕУ, што го исполнуваат само уште 26 земји во светот.
Министерот за финансии, Фатмир Бесими, посочи дека изминатите светски економски кризи – глобалната финансиска криза и економската криза предизвикана од пандемијата, не научија дека здравиот финансиски систем може да абсорбира дел од надворешните шокови. Оттаму е важна добрата координација помеѓу финансиските регулатори, во насока на будно следење на состојбите и преземање соодветни мерки и политики.
„Фискалната политика ќе биде поставена така, да преку соодветни мерки и политики се амортизираат ударите кои ќе доаѓаат однадвор за домашната економија и за стандардот на граѓаните. Тие ќе дојдат преку европската економија и главно ќе се одразат врз потрошувачката, преку ценовните притисоци од увезените примарни производи. Преку фискалната политика ќе се заложиме за граѓаните и стопанството да ги амортизираме тие притисоци. Веќе е изготвен сет на антикризни мерки, кој Владата набрзо ќе го презентира“, истакна Бесими.
Осврнувајќи се на состојбите на македонскиот пазар на капитал по ескалацијата на руско-украинскиот конфликт и предизвиците коишто се наметнаа, претседателката на КХВ, Нора Алити, нагласи дека тие имаа првично негативен одраз врз тргувањето на берзата, придружен со еднократен пад од 8,39% на МБИ 10 на берзанскиот ден кога започнаа воените дејствија, сѐ до нормализираното и вообичаено тргување, без драматичен предзнак. Кај нето-вредноста на отворените инвестициски фондови, заклучно со февруари, се забележува намалување од 2,4% во однос на јануари. Приливите се стабилни, додека одливите се благо зголемени (7,34%). Ваквите показатели за фондовите влегуваат во стандардните динамики и нема позначителни отстапувања од нивната кондиција. Имајќи предвид дека вредноста на вложувањата во хартии од вредност од руски компании изнесува околу 1,5 милиони евра, или 0,76% во вкупната нето-вредност на сите отворени инвестициски фондови, очекувана е и таква пропорција на неповолно влијание, посочи претседателката на КХВ.
Претседателот на Советот на експерти на МАПАС, Максуд Али, истакна дека за време на здравствено-енергетската криза и актуелните геополитички случувања, капитално финансираното пензиско осигурување делува стабилно и транспарентно со идентификувани ризици коишто се анализираат и се контролираат на редовна основа и во рамките на регулативата, со посебно внимание на инвестирањето на средствата на пензиските фондови. Како резултат на новонастанатата состојба, МАПАС внимателно го следи и реагирањето на пензиските друштва во однос на нивните инвестициски стратегии и тактики за остварување највисок принос, единствено во полза на членовите на пензиските фондови.
На седницата беше истакнато дека сите финансиски регулатори ќе продолжат со координирано следење на состојбите и навремена размена на сите релевантни информации и дека се подготвени да реагираат соодветно на случувањата, секој во рамките на надлежностите на својот мандат. Се заклучи дека сите регулатори на финансискиот систем имаат доволен опсег на инструменти што може да ги користат доколку е неопходно, со што се гарантира дека финансиската стабилност ќе биде одржана и во следниот период.
Над 180.000 граѓани вложиле во приватно здравствено осигурување
Повеќе од 23.000 осигуреници лани искористиле приватно здравствено осигурување за покривање трошоци од прегледи, интервенции, лекување и други медицински услуги. Девет осигурителни компании исплатиле 3,4 милиони евра за медицински трошоци покриени со приватно здравствено осигурување
Бројот на граѓани кои имаат приватно здравствено осигурување лани се зголемил за 60 отсто и надмина 182.000 осигурени лица. Приватното здравствено осигурување останува најбрзо растечки осигурителен производ од појавата на здравствената пандемија до сега. Лани се склучени повеќе од 18.000 договори за приватно здравствено осигурување со што бројот на активни договори за оваа осигурителна класа надмина 62.000, покажуваат официјалните податоци на Агенцијата за супервизија на осигурување.
Во приватно здравствено осигурување вложуваат граѓани лично, но и компании кои плаќаат осигурување за нивните вработени да можат да користат спектар од медицински услуги на приватните болници во земјава.
Оваа осигурителна класа овозможува осигурителните компании да покриваат трошоци за прегледи, третмани, интервенции и различни медицински услуги кои ги нудат приватните болници во земјава. За покривање на такви трошоци во приватното здравство 10 осигурителни компании за неживотно осигурување лани од осигуреници наплатиле вкупно 405 милиони денари (6,6 мил.евра). Минатата година вложувањата во приватно здравствено осигурување пораснале за 48 отсто (2,1 мил.евра) во споредба со 2020 година.
Осигурителните компании лани исплатиле над 23.000 штети т.е. барања за покривање на трошоци на осигурени граѓани за медицински услуги покриени со приватното здравствено осигурување. Бројот на барања за покривање на трошоци покриени со приватно здравствено осигурување лани е удвоен во споредба со 2020 година. Девет осигурителни компании за неживотно осигурување лани исплатиле над 211 милиони денари (3,4 мил.евра) трошоци за медицински услуги покриени со полисите за приватно здравствено осигурување. Износот на исплатени средства за покривање медицински трошоци лани е удвоен во однос на 2020 година.
Девет компании за осигурување неживот лани исплаќале штети за здравствено осигурување и тие се: „Кроација осигурување – неживот“, „Триглав Осигурување“, „Еуролинк“, „Еуроинс осигурување“, АДОР „Македонија осигурување ВИГ“, „Сава осигурување“, „Уника“ „Халк Осигурување“ и „Винер ВИГ“ . Најголемата исплатена штета за активирано здравствено осигурување, поединечно по компанија, се движи во распон од 277.000 денари до 615.000 денари (од 4.500 евра до 10.000 евра).
Приватното здравствено осигурување е осигурителен производ што нуди поквалитетна здравствена заштита за осигуреникот затоа што овозможува прегледи, лекувања, интервенции и други здравствени услуги во приватно здравство.
Дополнително оваа осигурителна класа индиректно го намалува притисокот и врз јавните здравствени установи така што овие осигуреници имаат покритие да користат услуги од приватните болници. При тоа медицинските услуги се финансираат од осигурителните компании, а не од државниот буџет.
Агенцијата за супервизија на осигурување (АСО) е независно регулаторно тело кое го регулира пазарот за осигурување, врши надзор над работата на осигурителните субјекти, се грижи за заштита на правата на осигурениците и придонесува за финансиска едукација и вклученост на населението.