Седница одржана на 20.03.2020
- Усвојување на Изјава на Агенцијата за супервизија на осигурување за ублажување на влијанието на Коронавирус/КОВИД 19 врз осигурителниот сектор.
Агенцијата за супервизија на осигурување будно ги следи состојбите во осигурителниот сектор и потенцијалните ризици кои може да влијаат на осигурителниот сектор како резултат на ширење на вирусот КОВИД-19. Истовремено, Агенцијата на дневна основа ги следи и препораките за намалување на ризиците, последиците и ефектите врз осигурителните пазар на Европското регулаторно тело EIOPA, а кои може да се применат на македонскиот осигурителен пазар и супервизија.
Советот на експерти одржа седница на ден 20 март, 2020 година со која претседаваше претседателот на Совет на експерти, г. Крсте Шајноски. Советот на експерти ја разгледа состојбата во осигурителниот сектор во контекст на актуелните случувања со ширење на вирусот КОВИД – 19.
Последните прибрани квартални податоци доставени со состојба 31.12.2019 година и спроведените вонтеренски супервизии на Агенцијата потврдуваат дека осигурителниот сектор е стабилен.
Во насока на оперативно олеснување на работењето на друштвата за осигурување и останатите субјекти на пазарот на осигурување во услови на вонредна состојба, Советот на експерти на Агенцијата за супервизија на осигурување заклучи:
1. се одложува започнување на прекршочни постапки спрема субјектите на супервизија;
2. се одложува спроведувањето на претходно планираните теренски супервизии на друштвата за осигурување и останатите субјекти на супервизија;
3. се овозможува флексибилност во доставувањето на редовните извештаи кои субјектите на супервизија имаат обврска да ги достават до Агенцијата во периодот на траење на вонредната состојба во државата, со можност истите да се достават во дополнителен рок од 30 дена од законски утврдениот роки;
4. им се наложува на субјектите на супервизија да ги преземат сите можни мерки за одржување на нивниот капитал и солвентност во насока на целосна заштита на правата на осигурениците;
5. се препорачува субјектите на супервизија да се воздржат од распределба на добивката на друштвата во форма на дивиденда или други бонуси спрема членови на органи на управување како и воздржување од трошење на средствата на друштвата на непродуктивни расходи, во периодот додека трае кризата;
6. се препорачува друштвата за осигурување да бидат свесни за околностите во кои се наоѓаат клиентите и да постапуваат правилно со нив во текот на целиот циклус почнувајќи од побарување, купување на производот/услугата, и обновување на договорот;
7. се одложува организирање на обуки и испити за застапници во осигурување и осигурителни брокери.
Агенцијата продолжува континуирано да ја следи состојбата и да презема соодветни мерки неопходни за намалување на негативното влијание врз стабилноста на осигурителниот пазар и заштитата на правата на осигурениците.
Редовно ќе ја продолжи комуникацијата со Владата, Министерството за финансии, со осигурителниот сектор, Здужението на осигурители и Асоцијацијата на осигурително брокерски друштва во рамки на Стопанската комора и останатите релевантни институции и редовно ќе ја информира јавноста за преземање на нови активности и дејсвија.
Агенцијата за супервизија на осигурување ја известува јавноста дека е во редовен контакт со субјектите на пазарот на осигурување (друштва за осигурување, осигурително брокерски друштва, друштва за застапување во осигурување, осигурителни брокери, застапници во осигурување, банки за застапување во осигурување, актуари, Национално биро за осигурување) за кои таа е надлежен регулаторен и супервизорски орган.
Од страна на Агенцијата преземени се активности и мерки на остварување непрекинатост во работењето. Мерките се однесуваат на интерната комуникација во Агенцијата за супервизија на осигурување и исто така, на остварување на комуникација со надворешни лица.
Заради непречено остварување на работењето на овие субјекти и институции, препорачуваме граѓаните и правните лица да ги следат и информациите кои овие институции ги објавуваат преку своите официјални канали за комуникација.
Имајќи ги предвид дополнителните мерки на Владата согласно акциониот план од Главниот штаб за управување со кризи за превенција и справување со појавата и ширењето на Коронавирусот, Агенцијата за супервизија на осигурување на 16 март донесе дополнителни дејствија и активности:
– Архивата ќе работи со скратено работно време, секој ден од 10-14ч (понеделник-петок).
– За упатување прашања, консултации и дописи до Агенцијата за супервизија на осигурување, препорачуваме да не се доаѓа лично во просториите на Агенцијата, тоа може да го направите преку редовна пошта и на е-адресите contact@aso.mk, izvestai@aso.mk, pretstavki@aso.mk, ukazuvaci@aso.mk или на телефонскиот број на архива 02/3254 050 и следните телефонски броеви:
Дирекција за работи непосредно поврзани со Советот на експерти, 072 263 624
Стручна служба за супервизија, 075 364 685
Стручна служба за регулатива и лиценцирање070 336 615
Стручна служба за општи и административни работи, 076 446 013
Во врска со известувања кои Субјектите ги поднесуваат до Агенцијата за супервизија на осигурување преку електронскиот систем за известување АСО Портал потребно е да бидат истовремено поднесени и на е-адреса izvestai@aso.mk. Известувањата треба да бидат во форма и содржина како што се прикачени на АСО Порталот.
Агенцијата за супервизија на осигурување ќе продолжи со непречено спроведување на своите надлежности на начин на кој ги организира вработените да продолжат со работа од дома и доколку се укаже потреба да дојдат на работното место во определениот временски период од 10-14ч.
Агенцијата за супервизија на осигурување на редовна основа го следи и анализира влијанието од ризикот од ширење на болеста COVID 19 (корона вирус) и согласно потребите ќе презема дополнителни мерки и активности.
Имајќи ги предвид национално утврдените мерки за превенција од ширење на корона вирус, Агенцијата за супервизија на осигурување презема конкретни мерки и активности за заштита на здравјето на своите вработени и здравјето на заедницата.
Тргнувајќи од овие цели, преземени се активности и мерки на остварување непрекинатост во работењето. Мерките се однесуваат на интерната комуникација во Агенцијата за супервизија на осигурување и исто така, на остварување на комуникација со надворешни лица.
Во претстојниот период:
– откажано е спроведување на обуки за застапници во осигурување и осигурителни брокери и електронско полагање на испитите,
– откажани се планираните активностите на спроведување теренски супервизии,
– откажани се учества на вработените на конференции, семинари и обуки организирани од страна на надворешни субјекти,
– откажани се сите настани организирани од Агенцијата, како и состаноци и други видови средби со надворешни субјекти,
– се откажуваат планираните посети за финансиска едукација,
– за упатување прашања, консултации и дописи до Агенцијата за супервизија на осигурување, да не се доаѓа лично во просториите на Агенцијата, тоа може да се оствари преку е-адресата contact@aso.mk или на телефонскиот број 02/3254 050.
Агенцијата за супервизија на осигурување на редовна основа го следи и анализира влијанието од ризикот од ширење на болеста COVID 19 (корона вирус) и согласно потребите ќе презема соодветни мерки и активности.
Советот на експерти на Агенцијата за супервизија на осигурување на последната седница оддржана на 27 февруари, постапувајќи по барањето на Grazer Wechselseitige Versicherung Aktiengesellschaft AG од Грац, Република Австрија за добивање согласност за стекнување на квалификувано учество во Акционерско друштвото за осигурување ЕУРОЛИНК Скопје, донесе Решение за издавање согласност за стекнување на квалификувано учество во друштво за осигурување.
Според оваа Решение, кое влегува во сила во денот на донесување, на Grazer Wechselseitige Versicherung Aktiengesellschaft AG со седиште на ул. Herrengаsse бр.18-20, 8010 Грац, Република Австрија и се дава согласност да стекне акции, кои претставуваат вкупен кумулативен износ кој надминува 75% од вкупно издадените акции со право на глас во Акционерското друштвото за осигурување ЕУРОЛИНК Скопје.
Grazer Wechselseitige Versicherung Aktiengesellschaft AG треба да ја изврши трансакцијата за стекнување на акциите во рок од 60 дена од денот на добивање на ова решение и за тоа да ја извести Агенцијата за супервизија на осигурување во рок од 5 (пет) работни дена од денот на стекнувањето на акциите.