Соопштенија

Агенцијата за супервизија на осигурување (АСО) , во рамки на своите законски надлежности и овластувања, и годинава осмисли и спроведува сет на активности за финансиска едукација на населението.

Меѓу основните цели на АСО е и заштитата на потрошувачите, развивање на свеста за осигурувањето и супервизијата на осигурување, финансиска едукација и инклузија.

Нашата задача, како независен регулатор на осигурителниот пазар, е во континитет да ја подигаме јавната свест и перцепцијата за осигурувањето како јавен интерес на целото општество.

Затоа мај го избравме за месец на финансиската писменост!

За повеќе детали следете не на edukacija.aso.mk и на социјалните мрежи (Facebook, Instagram, LinkedIn)

• Билтен на активности
• Реализирани активности – мај, месец на финансиска едукација

Меѓу најголемите поединечни исплатени штети пет се за осигурување од задолжителна автомобилска одговорност, четири од осигурување имот. Најголемата исплатена сума за штета од каско изнесува 94.000 евра, а за покритие од зелен картон е платено обештетување од  221.000 евра

Најголемата исплатена бруто штета од осигурување лани изнесува 23,5 милиони денари (382.000 евра), покажуваат официјалните податоци на Агенцијата за супервизија на осигурување (АСО). Штетата е исплатена е на правно лице за имот кој бил осигуруван во осигурителната компанија за неживот „Осигурување Македонија“.

Од најголемите поединечни исплатени штети (за секоја од 11 компании за осигурување неживот) лани пет се за исплата на задолжителна автомобилска одговорност, четири се за осигурување имот, а по една штета за каско осигурување моторно возило и зелен картон.

Втор највисок износ за обештетување, во конкуренција на осигурителните друштва кои покриваат ризици од неживот, е исплатен за осигурување имот од пожар. Станува збор за правно лице кое имало осигурување во „Уника“ за чие покритие оваа компанија исплатила 17,37 милиони денари (282.000 евра).

Најголем износ за штета која произлегува од задолжителната автомобилска одговорност лани исплатила „Сава Осигурување“ и износот е 13,5 милиони денари (219.500 евра). Речиси ист износ исплатила осигурителната компанија „Триглав осигурување“ за штета што е покриена со зелен картон. Најголемата штета што лани ја исплатил „Еуролинк“ изнесува 9,23 милиони денари (150.000 евра) и се однесува на обештетување по основ на пожар на имот. „Винер“ пак за покривање на штета врз имот лани на клиент платил 9,16 милиони денари (149.000 евра).

Во сегментот каско осигурување најголема штета лани исплатила „Кроација осигурување“ и таа изнесува 5,78 милиони денари (94.000 евра).

Најголеми поединечни штети во сегментот задолжителна автомобилска одговорност лани исплатиле и „Осигурителна полиса“ 7,6 милиони денари (124.000 евра), „Халк Осигурување“ 4,16 милиони денари (68.000 евра), „Евроинс осигурување“ 3,76 милиони денари (61.000 евра) и „Граве неживот“ (38.000 евра).

Граѓани, компании и институции од пријавени штети лани наплатиле вкупно 4 милијарди денари (65,1 милиони евра) што е на исто ниво како и во 2019 година. Од тоа за штети по полиси за неживотно осигурување компаниите на осигурениците исплатиле 3,57 милијарди денари (58 милиони евра).  Исплатите на штети по основ на осигурување живот изнесуваат 436,9 милиони денари (7,1 милиони евра)

Агенцијата за супервизија на осигурувањето (АСО) е независно регулаторно тело кое го регулира пазарот за осигурување, врши надзор над работата на осигурителните друштва, се грижи за заштита на правата на осигурениците и придонесува за финансиска едукација на населението.

Во организација на Агенцијата за супервизија на осигурување (АСО) вчера попладне започна обуката за актуари за работа во осигурителни компании и друштва кои управуваат со пензиски фондови. Ова е прва обука за овој суб-специјален профил на кадар во период од десет години, а четврта по ред од 2002 година досега.

На обуката, која ќе трае две години и ќе заврши со полагање испити, се пријавени 21 лице, а предавачи се реномирани професори од земјава и од странство.

Со свое поздравно обраќање пред идните актуари денеска се обрати и проф. д-р Крсте Шајноски, претседател на Советот на експерти на АСО кој истакна дека во актуарството како професија специјализирана за мерење и управување со ризици и неизвесност е многу значаен катализатор за раст, развој и унапредување на осигурителниот пазар и за финансиски здрави осигурителни друштва. И воедно додаде дека АСО интензивно работи за системско законско решение со кое на актуарите ќе им се зајакне статусот и улогата во осигурителната индустрија.

Ваков тип на обука, развиена според програмата на меѓународниот институт за актуари, во нашата земја се организира по четврти пат, откако во 2002 година е донесен Законот за супервизија на осигурување.

На досегашните три циклуси на обуки успешно се сертифицираа околу 30-тина актуари. Првите две обуки се организираа од страна на Министерството за финансии со техничка помош од Американската USAID, односно Волонтерскиот корпус за финансиски услуги, кои дадоа значаен придонес во формирањето на професионалното македонско актуарско здружение (МАЗ „АКТУАР“).

Осигурениците лани во полиси за покривање различни ризици вложиле 163,7 милиони евра

Граѓани, компании и институции од пријавени штети лани наплатиле 4 милијарди денари (65,1 милиони евра) што е на исто ниво како и во 2019 година. Од тоа за штети по полиси за неживотно осигурување компаниите на осигурениците исплатиле 3,57 милијарди денари (58 милиони евра).  Исплатите на штети по основ на осигурување живот изнесуваат 436,9 милиони денари (7,1 милиони евра), покажуваат официјалните податоци на Агенцијата за супервизија на осигурување (АСО).

Сите осигуреници лани во осигурување вложиле 10 милијарди денари (163,7 милиони евра). Во  период од пет години (од 2016 до 2020 година) биле купени полиси вредни 48,3 милијарди денари (785,2 милиони евра).

Во последниве пет години во осигурување живот граѓаните вложиле вкупно 7,98 милијарди денари (129,7 милиони евра). За полиси кои покриваат ризици од неживотното осигурување (автомобилска одговорност, каско, имот, општа одговорност, приватно здравствено и други видови осигурување) вкупно се платени 40,3 милијарди денари (655,5 милиони евра).

Продажбата на полиси за осигурување (бруто полисирана премија) лани во споредба со 2016 година е зголемена за 1,35 милијарди денари (22 милиони евра). Бројните ограничувања врз вкупните економски текови и особено врз мобилноста, кои лани ги предизвика здравствената пандемија, негативно се одразија и врз продажбата на полиси. Но благодарејќи на проактивниот пристап и соработката меѓу АСО и осигурителните компании вкупната продажба на полиси лани бележи благ пад од 5 отсто во споредба со 2019 година.

На осигурителниот пазар работат вкупно 16 друштва за осигурување меѓу кои 11 покриваат ризици од осигурување неживот, а 5 компании се специјализирани за осигурување живот.

Што ја одбележа 2020 година?

Продажбата на полиси од корпусот неживотно осигурување лани во вкупната бруто полисирана премија учествува со 82,7 отсто и изнесува 8,3 милијарди денари (135,4 милиони евра). Осигурителните друштва од продажба на полиси за осигурување живот инкасирале 1,74 милијарди денари (28,3 милиони евра) што претставува 17,3 отсто од целиот приход од продажба полиси.

И лани најголемо учество во целата продажба има осигурувањето моторни возила со 4,96 милијарди денари (80,65 милиони евра), пред осигурувањето имот со 1,86 милијарди денари (30,25 милиони евра). Најголем раст има кај приватното здравствено осигурување од чија продажба осигурителите наплатиле пет пати повеќе во однос на 2019 година.

Агенцијата за супервизија на осигурувањето (АСО) е независно регулаторно тело кое го регулира пазарот за осигурување, врши надозр над работата на осигурителните друштва, се грижи за заштитата на правата на осигурениците и придонесува за финансиска едукација на населението.

Паралелно со растот на вредноста на исплатени штети, расте и износот што земјоделците и сточарите го вложиле во полиси за осигурување. Лани продажбата на земјоделски полиси надминаа 7,8 милиони евра. Вложувањата на аграрните компании во земјоделско осигурување лани пораснале за 65 отсто.

Земјоделците и сточарите наплатиле 313,6 милиони денари (5,1 милиони евра) штети од осигурителните компании лани врз основа на покритијата од нивните осигурителни полиси. Вредноста на исплатите за настанати штети лани се зголеми за 56 отсто во споредба со претходната година, покажуваат официјалните податоци на Агенцијата за супервизија на осигурување (АСО).

Најголем раст на наплатени штети има кај земјоделските фирми кои врз основа  на осигуреното од своите полиси наплатиле 141,4 милиони денари (2,3 милиони евра) што е за 1,4 милиони евра повеќе исплати за штети во споредба со 2019 година.

На индивидуалните земјоделци минатата година осигурителните компании им надоместиле 2,8 милиони евра за настанати штети и тоа е за 18 отст повеќе од претходната споредбена година.

Паралелно со растот на исплатените штети расте и продажбата (бруто полисирана премија) на полиси за земјоделско осигурување. Аграрни компании, индивидуални земјоделци и сточари лани вложиле за 24 отсто повеќе во осигурување. Вкупната вредност на продадените полиси за земјоделско осигурување лани достигна вредност од 480 милиони днеари (7,8 милиони евра). Најголем раст на вложувања во осигурување има кај земјоделските и сточарските фирми кои за полиси лани издвоиле 65 отсто повеќе односно 215,2 милиони денари (3,5 милиони евра).

Земјоделските компании и индивидуалните земјоделци четири години во континуитет ги зголемуваат своите вложувања во полиси за осигурување на посевите, плодовите и добитокот. Според официјалните податоци на АСО продажбата на полиси за сите класи земјоделско осигурување од 2017 година до лани е зголемена за 2,5 пати.

Според евиденцијата на АСО четири компании кои нудат земјоделско осигурување лани продале вкупно 3.751 полиса. Од тоа 3.017 се индивидуални земјоделци и сточари, а 734 се земјоделски и сточарски компании.

Што осигуруваат земјоделците и сточарите?

Полисите за осигурување во земјоделството покриваат ризици од пожар, град, мраз, луња и дополнителни ризици врз посевите и плодовите. Кај осигурувањето добиток полисите покриваат ризици од последици од болести.

Агенцијата за супервизија на осигурувањето (АСО) е независно регулаторно тело кое го регулира пазарот за осигурување, врши надзор над работата на осигурителните друштва, се грижи за заштита на правата на осигурениците и придонесува за финансиска едукација на населението.

Почитувани,

Врз основа на член 158-б став (1) точка 4 и член 158-ѕ точка (1) а во врска со член 94 од Законот за супервизија на осигурување („Службен весник на Република Македонија” бр.27/02, 84/02, 98/02, 33/04, 88/05, 79/07, 08/08, 88/08, 56/09, 67/10, 44/11, 88/13, 43/14, 12/14, 153/15, 192/15, 23/16, 83/2018 198/18 и „Службен весник на Република Северна Македонија” бр.101/19 и 31/20), АСО изготви Предлог содржина Правилник за осигурување на живот во врска со удели во инвестициски фондови кога осигуреникот го презема инвестициониот ризик.

Повеќе детали на следниот линк.

Вредноста и бројот на продадени полиси за осигурување имот расте пет години во контиунитет. Лани, во услови на здравствена пандемија, расте осигурувањето имот кај: домаќинствата, компаниите, земјоделците и кај државниот сектор. Вкупната продажба на полиси за осигурување имот лани надмина 30 милиони евра и порасна за 5 отсто

Осигурителните компании (вкупно 11 друштва кои продаваат полиси за осигурување имот) лани на своите осигуреници им исплатиле вкупно за штети (бруто исплатени штети) 10,2 милиони евра, што е за 30 отсто повеќе од претходната година.

За штети од пожари и други природни непогоди лани биле надоместени 191 милиони денари (3,1 милиони евра), додека пак кај останатите имотни осигурувања лани осигурениците добиле 439 милиони денари (7,1 милиони евра).

Вкупната продажба (бруто полисирана премија) на полиси за осигурување имот  лани достигна 1,86 милијарди денари (30,26 милиони евра), покажуваат официјалните податоци на Агенцијата за супервизија на осигурување (АСО).

Вредноста на осигурителните полиси кои осигурниците ги купиле лани пораснала за 5 отсто (1,43 милиони евра) во споредба со 2019 година.

Зголемен е и бројот на склучени полиси за осигурување имот на физички лица и на правни лица. Вкупниот број на полиси за осигурување на имот во 2020 изнесува 135.223 што е за 4 отсто повеќе споредено со претходната година.

Граѓаните лани во осигурителни полиси вложиле вкупно 507,4 милиони денари (8,25 милиони евра), а приватни компании и државните институции платиле 1,35 милијарди денари (22,01 милиони евра). Најголемо учество во вкупната вредност на осигурувањето лани имаат осигурувањата на градби и нивната содржина (13,3 милиони евра) и земјоделските осигурувања (7,84 милиони евра).

При тоа, осигурувањето на имот (освен пожар и други природни непогоди) пораснало за 7 отсто во однос на 2019 година и надминало 1,09 милијарди денари (17,76 милиони евра), што пред сè се должи на градежната експанзија во урбаните средини.

Зголемување од 2 отсто има и кај продажбата на осигурување од пожар и други природни непогоди која достигна 768,2 милиони денари (12,5 милиони евра).

Податоците што ги објавува АСО се достапни и на следниот линк https://aso.mk/preliminarni-podatoczi-bruto-polisirana-premija-bruto-isplateni-shteti/

Агенцијата за супервизија на осигурувањето (АСО) е независно регулаторно тело кое го регулира пазарот за осигурување, врши надзор над работата на осигурителните друштва, се грижи за заштита на правата на осигурениците и придонесува за финансиска едукација на населението.