Настани

Во интерес на пратење на современите трендови во управувањето со ризиците, Агенцијата за супервизија организираше дводневен семинар со тема “Управување со ризици кај претпријатијата” – An Overview of Enterprise Risk Management (ERM). Семинарот се одржа на 24ти и 25ти ноември, од 09 до 13 часот, на Европскиот универзитет Скопје. Претседателот на Советот на експерти на Агенцијата, г. Климе Попоски, ја отвори средбата и им посака добредојде на учесниците. На семинарот присуствуваа актуари, порфолио менаџери, како и претставници од секторите за финансии на друштвата за осигурување.

Предавач на овој семинар беше реномираниот проф. Thomas A. Aiuppa, Ph.D., CPCU, од Colorado State University, Соединети Американски Држави.

Семинарот беше организиран со цел да го промовира значењето на концептот на ERМ, во контекстот на системскиот пристап, во кој е потребно е да се одредат односите меѓу поединечните ризици за да се оцени ефектот на ризикот на портфолиото, како особено значајна проблематика во осигурителната индустрија.

На иницијатива на Агенцијата за супервизија на осигурување, на ден 22 ноември, 2010 година во седиштето на Агенцијата, се оддржа работна средба на тема “Примената на Европскиот Извештај за сообраќајни незгоди во Република Македонија”.

На средбата присуствуваа претставници од Националното Биро за осигурување, друштвата за осигурување членки на Бирото, Министерството за внатрешни работи и Републичкиот совет за заштита на сообраќајот на патиштата. Целта на оваа средба беше да се дискутира за функцијата и практичната примена на Европскиот Извештај за сообраќајни незгоди, се во насока на брза и ефикасна асистенција на крајните корисници односно осигурениците на моторни возила.

Претседателот на Советот на експерти на Агенцијата г. Климе Попоски ја отвори средбата и им посака добредојде на учесниците. Странскиот експерт од областа на осигурувањето г. Jean-Pierre Daniel кој е во подолг ангажман во Агенцијата, изврши Презентација за искуствата на Европскиот пазар.

По неговото излагање следеше плодна дискусија и сето тоа допринесе за носење на заклучоци во насока на креирање на стратегија за понатамошна успешна имплементација на Европскиот Извештај за сообраќајни незгоди во Република Македонија.

Во периодот од 27-29 Октомври, 2010 година Меѓународната Асоцијација на осигурителни супервизори (ИАИС). ја оддржа 17-тата годишна Конференција. Домаќин на овој традиционален настан беше Регулаторното финасиско тело на Дубаи. На оваа Конференција се случи официјалното прогласување и прифаќање на членството на Агенцијата за супервизија на осигурување на Република Македонија како рамноправна членка на ИАИС и нејзино евидентирање во регистрите под уставното име на нашата земја.

Присуствуваа голем број на учесници од осигурителните регулаторни тела и осигурителни професионалци кои имаа можност да дискутираат и дебатираат за пазарните услови, трендовите и регулаторните промени во ова предизвикувачко финансиско опкружување.

На оваа Конференција се донесоа следните одлуки:

• Едногласно избирање на Претседавач на Комитетот на ИАИС г. Питер Браумулер, по втор пат;
• Усвојување на нов стратешки план за финасиските перспективи во периодот 2011-2015 и поставување на цели и приоритети за негова операционализација;
• Усвојување на двогодишен план и поставување на високи цели и приорители во овој период. Овој план вклучува понатамошно зајакнување на регулативата, идентификување на ризиците на глобално ниво,  зајакнување на капацитетот на регулаторите, превземање на понатамошни истражувања и развој на системскиот ризик во секторот на осигурувањето и развивање на методологија на негово квантитативно и квалитативно мерење.  Покрај тоа, ИАИС се обрза да обезбеди и широка лепеза на упатства и стандарди за тоа како да се идентификуваат домашните и глобалните системски ризици;
• Усвојување на 8 супервизорски принципи, кои претставуваат прв чекор во ревизијата на постојните супервизорски принципи и стандарди;
• Потпишување на два Мултилатерални меморандуми за соработка.

За Меѓународната Асоцијација на осигурителни супервизори (ИАИС)

Асоцијацијата е основана во 1994 година, со седиште во Базел и има мисија да ги претставува осигурителните регулатори и супервизори кои во моментов се 190 јурисдикции во околу 140 земји. Ова значи дека ИАИС има повеќе од 120 осигурителни професионалци, осигурители, реосигурители, трговски асоцијации и набљудувачи. ИАИС е издавач на меѓународните осигурителни стандарди, принципи и упатства, обезбедува тренинг обуки и поддршка во врска со прашања од областа на осигурувањето и супервизијата, организира состаноци и семинари за осигурителните супервизори.

ИАИС има воспоставено блиски односи на соработка со други меѓународни институции со цел промовирање на финасиската стабилност.

Во периодот од 6-8 Октомври, 2010 година Националното Биро за осигурување ја оддржа втората годишна Конференција од областа на осигурувањето на тема “Перспективи на осигурителниот пазар на Република Македонија”. На овој настан присуствуваа голем број учесници,професионалци од областа на осигурувањето и експерти од осигурителните регулаторни тела од земјата и странство, пришто преку панел дискусии се разменуваа мислења и се споделуваа искуства.

На покана на Агенцијата за супервизија на осигурување пристигнаа и гости од регулаторните теле од Словенија, Германија, Бугарија, Австрија и Албанија.

Агенцијата имаше свој настап на Конференцијата и нејзината презентација може да се преземе тука.

За подетални информации во врска со Конференцијата Ве молиме погледнете на www.nibm.com.mk.

На 14.10.2010 година со почеток во 14 часот, во просториите на Европски Универзитет, Агенцијата започнa со спроведување на првата обука за застапници во осигурувањето.

Обуката беше отворена од страна на Претседателот на Советот на експерти на Агенцијата кој им посака добредојде на присутните и успех на обуката. Исто така, обраќање имаше и г. Жан Пјер Даниел кој во моментов е со консултантски ангажман во Агенцијата и има долгогодишно искуство во областа на посредувањето во осигурувањето.

Агенцијата очекува преку овој процес на едукација да се зајакне професијата на застапување во осигурувањето и значително да се подобри општата состојба на пазарот на осигурување во Република Македонија.

Согласно планот на Агенцијата процесот на едукација е предвиден да се реализира во повеќе групи. Агенцијата на својата веб страница ќе ги објавува сите информации во врска со обуката.

Во среда, 29 септември 2010 година (во 11:00 часот) специјалниот претставник на Европската Унија и шефот на Делегацијата Амбасадорот Ерван Фуере ја посети Агенцијата за супервизија на осигурување.

Посетата од страна на Амбасадорот е со цел поблиско запознавање со активностите што Агенцијата ги презема во рамки на техничката помош обезбедена од европските фондови согласно ИПА Програмата.Тековно Агенцијата е корисник на овие фондови и како резултат на тоа ќе реализира бројни активности кои ќе резултираат со носење на акти, правилници и упатства од областа на осигурувањето и супервизијата.

Ова е прва посета на Амбасадорот во седиштето на Агенцијата за супервизија на осигурување. Во рамки на посетата Амбасадорот имаше можност да се запознае со активностите на Агенцијата како и непосредно да се сретне со вработените и да ги разгледа новите простории на Агенцијата.

Потоа, Амбасадорот и Претседателот на Советот на експерти на Агенцијата г. Климе Попоски дадоа изјави за работењето на регулаторното тело, неговите надлежности на пазарот на осигурување како и предизвиците.

На ден 22 септември, 2010 година, во Виена, во седиштето на Регулаторното тело за финансиски пазар на Австрија, Агенцијата за супервизија на осигурување на Република Македонија ја продлабочи соработката со Австрискиот регулатор, со потпишување на Меморандум за соработка.

Овој Меморандум отвара простор за понатамошна успешна соработка, размена на информации и искуства, организирање на заеднички контроли и зајакнување на капацитетите.

Од исклучителна важност претставува потпишувањето на Меморандумот, пред се заради присуството на австриските реномирани компании на Македонскиот осигурителен пазар од кои две се активни во доменот на неживотното осигурување и една компанија е активна во доменот на осигурувањето на живот.

Во периодот од 31 мај до 1 јуни, Претседателот на Советот на експерти на Агенцијата во придружба на извршните членови беа во посета на Комисијата за финасиски пазар во Бугарија. Целта на оваа посета беше воспоставување и зајакнување на соработката меѓу двете регулаторни тела. Во насока на ова беше потпишан и Меморандум за соработка.

Меморандумот за соработка го потпишаа г. Климе Попоски, претседател на Советот и г. Петар Чобанов, претседател на Бугарското регулаторно тело.

Се очекува преку размена на информации и податоци значително да се придонесе за понатамошен развој на осигурувањето и поголема транспарентност на субјектите како на домашниот така и на странските пазари како и поголема ефикасност на супервизорската функција.

Агенцијата за супервизија на осигурување на 29.04.2010 (четврток) беше домаќин на Австриското регулаторно тело за финансиски пазар претставувано од страна на г. Питер Браумулер како директор на секторот за осигурителна и пензиска супервизија, а воедно и претседавач на Извршниот Комитет на Меѓународната Асоцијација на Осигурителни Супервизори (ИАИС).

По повод гостувањето на г. Браумулер, Агенцијата организираше дебата на тема “Развојот на осигурувањето во глобални рамки”, која се одржа во Дипломатик салата на Скопскиот Саем.

„Агенцијата за супервизија на осигурување ќе настојува многу почесто да се одржуваат форуми од ваков тип, на коишто отворено ќе се дискутира за проблемите и начинот како да се подобри ефикасноста на пазарот на осигурување, затоа што ова е еден од начините да се подобри корпоративното управување кај субјектите и да се зголеми транспарентноста во работењето.  Овие настани исто така се од исклучително значење за иницирање и развој на билатерална и мултулатерална меѓународна соработка “- нагласи г. Климе Попоски во својата изјава за медиумите.

Претседателот на Советот на експерти на Агенцијата, г. Климе Попоски имаше воведно обраќање со кое го означи почетокот на  дебатата, а исто така одржа и презентација за состојбата на осигурителниот пазар во Р. Македонија во која ги изнесе основните економски индикатори за работењето на друштвата за осигурување во земјата за изминатата  2009 година.

Господинот Браумулер во својата презентација зборуваше за глобалните и европски достигнувања на осигурителниот пазар  новите предизвици на регулаторните органи и воведувањето на нова надзорна архитектура (Солвентност 2), со осврт на карактеристиките на Австрискиот  финансиски пазарен орган (ФМА), како и за идните предизвици на австрискиот пазар.

По презентацијата следеа прашања до г. Браумулер и г. Попоски кои ја отворија дебатата.