Седница одржана на 24 јануари
- Записник од 1-та седница на СнЕ на АСО одржана на 10 јануари, 2025 година,
- Одлука во однос на сторен прекршок од страна на oсигурително брокерско друштво,
- Решение за давање дозвола за работа како овластен актуар.
Средба на гувернерката со претседателката на АСО: Финансиската стабилност е заеднички приоритет
Блиската соработка помеѓу финансиските регулатори игра значајна улога во зачувувањето на финансиската стабилност, особено земајќи ги предвид глобалните неизвесности и ризици. Со постојан координиран надзор и навремена размена на информации, регулаторите можат подобро да ги предвидат и да се справат со потенцијалните предизвици за финансискиот систем. Таквата соработка обезбедува ефективно спроведување на макропрудентните мерки, ја зајакнува отпорноста и придонесува за одржлив економски раст. Ова беше посочено на средбата помеѓу гувернерката на Народната банка, Анита Ангеловска-Бежоска и новоназначената претседателка на Советот на експерти на Агенцијата за супервизија на осигурување (АСО), Ели Дракуловска, која воедно е и нов член на Комитетот за финансиска стабилност.
На средбата беа разгледани сегашните параметри во банкарскиот и осигурителниот сектор, при што беше заклучено дека податоците покажуваат стабилност во двата сектора, што, пак, придонесува кон општата финансиска стабилност. Гувернерката на Народната банка, Ангеловска-Бежоска, истакна дека во изминатите години, и покрај предизвиците коишто произлегоа од повеќето кризи, банкарскиот сектор обезбеди солидна кредитна поддршка за домаќинствата и компаниите, поддржана од солидниот раст на депозитите, и тоа пред сѐ во домашна валута и на подолги рокови. Ваквите позитивни промени во билансите на банките беа проследени и со постојано зајакнување на солвентноста и ликвидноста на банките, при задржување на квалитетот на кредитното портфолио.
Ели Дракуловска, претседателка на Советот на експерти на АСО, пак, истакна дека соработката меѓу регулаторите во финансискиот сектор е особено важна за успешно и сеопфатно заедничко делување коешто е предуслов за остварување и задржување на финансиската стабилност. Притоа, АСО како регулатор на осигурителниот пазар во рамките на своите надлежности постојано и целосно е посветен на подобрување на амбиентот за работа и законските рамки заради внесување новини во осигурителната индустрија за зголемување на бруто полисираната премија и вложувањата во осигурителниот сектор.
Од 2020 година, преку потпишување на Меморандумот за соработка, беше формиран Комитетот за финансиска стабилност во кој учествуваа сите тела надлежни за супервизија и надзор на одделните сегменти од финансискиот систем (Народната банка, Министерството за финансии, Комисијата за хартии од вредност (КХВ), Агенцијата за супервизија на капитално финансирано пензиско осигурување (МАПАС) и Агенцијата за супервизија на осигурувањето (АСО)). Од 2022 година, со носењето на Законот за финансиска стабилност, Комитетот за финансиска стабилност правно се врамува, како меѓуинституционално тело одговорно за следење на спроведувањето на макропрудентната политика во земјава и за координација на активностите при идентификувањето и следењето на системските ризици во одделните сегменти од финансискиот систем и на финансискиот систем во целина при преземањето макропрудентни мерки и подготовката и управувањето со финансиска криза.
Седница одржана на 10 јануари
- Записник од 31-та седница на СнЕ на АСО одржана на 6 декември, 2024 година,
- Барање за добивање согласност лицето Аднан Емровски да ја врши функцијата член на орган на управување во УНИКА ЛАЈФ АД Скопје и донесување на решение,
- Извештај во однос на спроведен испит за единаесеттиот предмет од Наставната програма за спроведување на стручниот испит потребен за добивање на дозвола за работа како овластен актуар (2023-2025) – ПЕНЗИСКО ОСИГУРУВАЊЕ.
Информација за јавност
Советот на експерти (СнЕ) како раководно тело на Агенцијата за супервизија на осигурување (АСО), го претставуваат:
- Ели Дракуловска – Претседател на Советот на експерти на Агенцијата за супервизија на осигурување, со мандат од пет години, започнувајќи од 27 декември 2024 година ;
- Александра Дранговска, професионално ангажиран член со полно работно време, со мандат од пет години започнувајќи од 27 декември 2024 година ;
- Горан Здравковски, професионално ангажиран член со полно работно време, со мандат до 25 октомври, 2028 година и
- Бобан Пановски, непрофесионално ангажиран член, со мандат до 25 октомври, 2028 година;
Информација за јавност од Агенцијата за супервизија на осигурување
Почитувани, врз основа на клучните принципи на Агенцијата за супервизија на осигурување (АСО) за транспарентно и отчетно известување, ја информирање јавноста дека на 12 декември годинава истече мандатот на два члена на раководниот орган на АСО, а воедно во истиот ден републичкото Собрание констатира прекин на мандат на останатите три члена на раководниот орган односно на Советот на експерти (СнЕ). За конституирањето на новиот состав на огранот на управување односно Советот на експерти (СнЕ) навремено ќе ја иноформираме јавноста.
Агенција за супервизија на осигурување
Седница одржана на 6 декември
- Записник од 30-та седница на СнЕ на АСО одржана на 4 декември, 2024 година,
- Одлука во однос на неусогласеноста на Друштвото за животно осигурување УНИКА ЛАЈФ АД Скопје и донесување на решение за изрекување дополнителни мерки;
- Одлука за измена на Одлуката за изрекување мерки на супервизија кон Друштвото за осигурување Евроинс Осигурување АД Скопје бр. 08-791/1 од 20.11.2024 година.
По повод „Деновите на финансиска писменост“: Награди, пофалници и благодарници за најкреативни ученички творби
Агенцијата за супервизија на осигурување (АСО) во рамки на своите континуирани активности за зголемување на јавната свест за потребата и значењето на финансиската писменост за осигурувањето меѓу младата популација и годинава додели награди и признанија на ученици за најкреативни творби со кои се отсликува значењето на осигурувањето.
По тој повод денеска во АСО гостуваа средношколци кои беа автори на есеи со најкреативни пораки кои го отсликуваат значењето на осигурувањето. На работилницата што ја посветивме на значењето на финансиската писменост во областа на осигурувањето со нив и нивните наставници разговаравме за нивното искуство и потребата за осигурувањето, како и за вклученоста на осигурувањето во образовниот процес.
Разменивме искуства и идеи за подобрување на ефектите од кампањите за финансиска едукација кои АСО редовно ги прави за подигање на свесноста за потребата од осигурување.
Воедно со учениците од кои поголем дел ќе бидат идни студенти разговараме и за нивните идни планови и за перспективите што ги нуди образованието и вработувањето во Македонија.
Со овој настан АСО ги заврши активностите по повод „Деновите на финансиска писменост“, а воедно успешно го реализираше 13 по ред Конкурс за избор на теми по повод 1 ноември – денот на осигурувањето. На темите „Осигурувањето ме заштитува од ризици“ , „Моја инвестиција – полиса за осигурување“ и „Животот е полн со изненадувања, осигурувањето е моја финансиска сигурност“ годинава АСО доби повеќе од 150 цртежи, песни и есеи од ученици на возраст од 6 до 17 години од неколку десетици основни и средни школи од повеќе градови и населени места ширум земјава.
На конкурсот беа наградени вкупно 9 творби (по три за есеј, песна и цртеж), а беа доделени 44 пофалници на талентирани ученици. За наставниците ментори на учениците беа доделени 32 благодарници.
АСО во рамки на своите активности по повод Деновите на финансиска писменост во ноември посетува училишта во кои преку соодветни форми на интерактивна комуникација едуцира ученици за значењето на осигурувањето, учествува на ТВ емисија од едукативен формат и публикува содржини на социјалните мрежи со изразена едукативна компонента за атрубитите на осигурителните производи и за заштитата на правата на осигурениците.
АСО пружа можност за едукативни посети и интерактивни предавање за сите училиште на теми од областа на финансиска едукација во осигурувањето, а податоците се достапни на веб страницата на АСО.
Агенцијата за супервизија на осигурување (АСО) е независно регулаторно тело кое го регулира пазарот за осигурување, врши надзор над работата на осигурителните субјекти, се грижи за заштита на правата на осигурениците и придонесува за финансиска едукација и вклученост на населението.
