Денови на финансиска писменост: АСО додели награди и пофалници на 37 основци и средношколци за творби од областа на осигурувањето
АСО додели награди и пофалници на 37 ученици, од основни и средни училишта ширум земјава, за цртежи, есеи и песни на теми од областа на осигурувањето. Со оваа активност симболично АСО ги започна „Денови на финансиска писменост 2023“ кои ги организираат сите регулатори на финансискиот пазар. За значаен придонес во унапредување на финансиската писменост кај учениците АСО додели и благодарници на 20 наставници – ментори кои континуирано и посветено работат со учениците на градење на свесноста за значењето на осигурувањето за општата благосостојба на населението
Агенцијата за супервизија на осигурување (АСО) награди девет ученици и издаде пофалници на уште 28 основци и средношколци кои креираа цртежи, есеи и песни на теми поврзани со значењето на осигурувањето. Тие беа избрани како најдобри во конкуренција на речиси 200 творби на тема осигурување чии автори беа ученици од основни средни училишта ширум земјава.
Воедно АСО додели 20 благодарници на наставници – ментори од различни училишта кои работат со учениците на теми за зајакнување на финансиската писменост со особен аспект на осигурувањето.
По тој повод Крсте Шајноски, претседател на Советот на екперти на АСО, денеска ги додели наградите и признанијата на учениците и ученичките од основните и од средните училишта.
Во оваа прилика Шајноски истакна дека градење на свеста за значењето на осигурувањето, на што АСО посветува особено внимание, е неопходен предуслов за подигање на животниот стандард и општата благосостојба во секое општество. На присутните наградени и пофалени ученици им порача дека тие се партнери на АСО во мисијата за градење на култура на осигурување. При тоа се заблагодари на наставниците – ментори за нивниот придонес во зајакнувањето на финансиската едукација.
Со овој настан АСО ги започна активностите по повод „Деновите на финансиска писменост“, а воедно успешно го реализираше јубилејниот 11 по ред Конкурс за избор на теми по повод 1 ноември – денот на осигурувањето. На темите „Осигурувањето ме заштитува од ризици“ , „Моја инвестиција – полиса за осигурување“ и „Животот е полн со изненадувања, осигурувањето е моја финансиска сигурност“ годинава АСО доби речиси 200 цртежи, песни и есеи од ученици на возраст од 6 до 17 години од неколку десетици основни и средни школи од повеќе градови и населени места ширум земјава.
Деновите на финансиска писменост традиционално седма година по ред ги организираат сите регулаторни тела од областа на финансиите (Народната банка, Комисијата за хартии од вредност, Агенцијата за супервизија на осигурување – АСО и Агенцијата за супервизија на капитално-финансирано пензиско осиурување МАПАС).
АСО во рамки на своите активности по повод Деновите на финансиска писменост во ноември посетува училишта во кои преку соодветни форми на интерактивна комуникација едуцира ученици за значењето на осигурувањето, учествува на ТВ емисија од едукативен формат и публикува содржини на социјалните мрежи со изразена едукативна компонента за атрубитите на осигурителните производи и за заштитата на правата на осигурениците.
АСО пружа можност за едукативни посети и интерактивни предавање за сите училиште на теми од областа на финансиска едукација во осигурувањето, а податоците се достапни на веб страницата на АСО.
Агенцијата за супервизија на осигурување (АСО) е независно регулаторно тело кое го регулира пазарот за осигурување, врши надзор над работата на осигурителните субјекти, се грижи за заштита на правата на осигурениците и придонесува за финансиска едукација и вклученост на населението.
АСО додели награда за најдобар истражувачки труд за осигурувањето на студент од Охрид
Истражувањето на Антонио Крстаноски, студентот на катедрата по осигурување на охрдискиот факултет, меѓу другото го обработува влијанието на корона кризата врз концентрацијата во осигурителниот бизнис во 28 земји на Источна Европа. АСО 13 години по ред на денот на осигурувањето доделува парична награда од 80.000 денари на млад научник-истражувач. Годинава во конкуренција на седум труда беше избрано истражувањето на Крстаноски
Агенцијата за супервизија на осигурувањето (АСО) додели награда за најдобар истражувачки труд на млад научник на тема од областа на управување со ризици во осигурувањето. Наградата на младиот научник Антонио Крстаноски, студент на Факултет за туризам и угостителство – Охрид, насока осигурување, му ја додели проф. д-р Крсте Шајноски, претседател на Советот на експерти на АСО. Плакетата на Крстаноски му беше доделена по повод одбележувањето на Националниот ден на осигурувањето –1 ноември, а за трудот кој е избран за победник предвидена е годишна награда во износ од 80.000 денари.
Трудот на авторот Антонио Крстаноски “Трендови во концентрацијата на пазарите на осигурување во Источна Европа” ги испитува трендовите во концентрацијата на пазарите на осигурување во Источна Европа од 2010 до 2020 година. Во анализата се вклучени 28 земји од Источна Европа, а исто така и македонскиот пазар на осигурување е вклучен во анализата.
Приложените анализи во трудот покажуваат дека концентрацијата на пазарите на осигурување во Источна Европа значајно опаѓа во периодот пред и по воведувањето на новата регулатива Солвентност 2, а додека пак во периоди на економски и здравствени кризи, пазарната концентрација се зголемува што укажува дека поконцентрираните пазари се постабилни во периоди на неизвесност поради издржливоста на поголемите компании. Исто така, поголемата економска развиеност и подобрата регулација се поврзани со поконкурентни пазари на осигурување.
Во заклучниот дел, авторот укажува на тоа дека пазарите на осигурување во Источна Европа се карактеризираат со значајна разноликост во поглед на ефикасноста и структурата на националните осигурителни сектори и имаат повеќе специфичности. На крај, заклучува дека поконцентрирани осигурителни сектори функционираат подобро во време на кризи, додека пак, во време на отсуство на кризи помалку концентрирано сектори се поповолни.
Целта на конкурсот е да послужи како стимулација за развојот на научната мисла и изработка на трудови од областа на управување со ризици и осигурување во Македонија, како и афирмација на млади и стручни кадри.