Седница одржана на 21.04.2015
- Решение за давање согласност за вршење работи на застапување во осигурување од страна на банка;
Известување
Агенцијата за супервизија на осигурување ги известува сите пријавени кандидати за обука за застапници во осигурување односно осигурителни брокери, дека обуката ќе се одржи во просториите на Европски Универзитет.
Распоредот за обуката за застапници во осигурување можете да ја симнете тука.
Распоредот за осигурителни брокери можете да ја симнете тука.
Соопштение за спроведување на обука и стручен испит за вршење работи на застапување во осигурување и обука и стручен испит за вршење осигурително брокерски работи
Агенцијата за супервизија на осигурување ја информира јавноста дека ќе организира обука за вршење работи на застапување во осигурување и обука за вршење осигурително брокерски работи.
Обуката за вршење работи на застапување во осигурување во времетраење од 3 дена (вкупно 18 наставни часа) ќе се спроведе во периодот 23, 24 и 25 Април 2015 година а обуката за вршење осигурително брокерски работи во времетраење од 5 дена (вкупно 27 наставни часа) ќе се спроведе во периодот 23, 24, 25, 27 и 29 Април 2015 година. Точните термини и деталниот распоред на предавањата во рамки на обуките ќе биде објавен на интернет страницата на Агенцијата за супервизија на осигурување пред отпочнување на обуките.
Во рок од најмалку 15 дена од денот на завршување на обуките, Агенцијата ќе спроведе стручен испит за вршење работи на застапување во осигурување односно осигурително брокерски работи. Точниот термин за полагање на стручниот испит за вршење работи на застапување во осигурување односно стручниот испит за вршење осигурително брокерски работи ќе биде објавен на интернет страницата на Агенцијата за супервизија на осигурување најмалку во рок од 3 дена пред одржување на стручниот испит.
- Соопштение за спроведување на обука и стручен испит за вршење работи на застапување во осигурување и обука и стручен испит за вршење осигурително брокерски работи..
- Пријава/ барање за учество на обука и полагање на стручен испит за застапник
- Пријава/ барање за учество на обука и полагање на стручен испит за брокер
Седница одржана на 31.03.2015
- Одлука за изрекување мерки на супервизија спрема Акционерското друштво ЕВРОИНС ОСИГУРУВАЊЕ Скопје;
Седница одржана на 19.03.2015
- Правилник за изменување на Правилникот за формата, содржината и начинот на водење регистри на застапници во осигурувањето и осигурителни брокери од страна на друштвата за осигурување, осигурително брокерските друштва и друштвата за застапување во осигурување,
- Правилник за изменување на Правилникот за формата, содржината и начинот на водење регистри на застапници во осигурувањето, друштва за застапување во осигурувањето, осигурителни брокери, осигурително брокерски друштва и банки;
Светска недела на пари
“Светска недела на пари” е настан кој го одбележуваат голем број на земји во светот и истиот е повод на едно место да се сретнат и обединат младите и децата со единствена цел да се стекнат со знаење и основни поими од сферата на финасиите, финасиското работење и управувањето со ризиците. Од 2014 година и нашата земја се приклучи кон ова движење во чиишто рамки се одржуваат преку 2000 активности во кои се вклучени над 3 милиони деца и млади во повеќе од 120 земји и каде што работат 500 организации и институции. Оваа глобална иницијатива ја подигнува свеста кај младите преку учење за тоа како функционираат парите, вклучувајќи го штедењето, вработувањето и претприемаштвото. Секоја година младите луѓе дискутираат, читаат и учат за економските и за финансиските системи преку најразлични манифестации чија основна цел е финансиска едукација и финансиска вклученост на младата популација, но исто така и на останатото население. Со ваквите активности се стимулираат младите луѓе да станат свесни за своите финансиски права, се насочуваат кон пристапност до финансиските услуги и производи и се развиваат нивните финансиски вештини.
На 9.3.2015 година, Координациското тело на регулаторните институции за финансиска едукација во Република Македонија, во кое членуваат претставници на Народната банка, Министерството за финансии, Комисијата за хартии од вредност, Агенцијата за супервизија на осигурувањето и Агенцијата за супервизија на капитално финансираното пензиско осигурување, официјално го означи почетокот на „Светската недела на пари“ во 2015 година. Настанот беше организиран во просториите на СЕПУГС „Васил Антевски-Дрен“ во Скопје, во соработка со директорот на училиштето, професорите и учениците од трета и четврта година. Одбележувањето на официјалниот почеток на Глобалната недела на парите се одвиваше преку запознавање на учениците со работата на Координациското тело и активностите во полето на финансиската едукација кај секоја од институциите.
Со цел активно вклучување беше организиран квиз во кој учениците беа поделени во три тимови кои тие ги именуваа со финансиски поими. Тимовите одговараа на зададени прашања од областа на работењето на петте регулатори, членки на Координациското тело. Правилата на игра беа одредени од Координациското тело со тоа што предност за одговарање на прашање имаше првопријавениот тим. На учениците за секој точен одговор им се доделуваше симболична награда. Им беа доделени награди во вид на репрезентативен материјал што на својствен начин ја одбележува Глобалната недела на пари.
Агенцијата за супервизија на осигурување како активен подржувач на движењето Светска недела на пари, презентираше на тема осигурување, основни поими на осигурување и управување со ризици во осигурување. Исто така, Агенцијата во соработка со Министерството за образование и Националното биро за осигурување промовираше друштвена детска игра “Помалу ризик, повеќе забава” . Тоа е игра на табла и се базира на учесници со различни улоги. Во текот на играта, учесникот може да се пронајде во улога на дете, тинејџер, младо возрасно лице, родител, баба или дедо и сето тоа во зависност каква карта за играње ќе извлече во текот на играта.
Во текот на месец март Агенцијата активно ќе настапува со презентации во средните училишта но исто така, дополнително и во текот на годината ќе организира настапи во основни и средни училишта низ повеќе градови во земјата.
Oдржана работилница на НБРМ и АСО на тема: Истакнување на потенцијалните влијанија на природните катастрофи врз работењето на комерцијалните банки
На ден 27.2.2015 година во просториите на Народната банка на Република Македонија се одржа работилницата на тема: Истакнување на потенцијалните влијанија на природните катастрофи врз работењето на комерцијалните банки. На работилницата учествуваа членови на Управните одбори на банките и лица одговорни за управување со ризиците во банките.
Работилницата беше организирана како заеднички проект на Народната банка на Република Македонија (НБРМ) и Агенцијата за супервизија на осигурувањето (АСО), со цел зголемување на свеста за ризиците за банките, како и за целокупниот финансиски систем на земјата, коишто произлегуваат од катастрофалните ризици и временските непогоди, во услови на недостаток на доволно механизми за нивно ублажување.
Воведни обраќања на работилницата имаа г-ѓа Милица Арнаудова Стојановска, директор на Секторот за супервизија, банкарска регулатива и финансиска стабилност при НБРМ и г. Климе Попоски, претседател на Совет на експерти на АСО.
Предавачи на работилницата беа претставниците од Европа Ре, г-ѓа Маријана Лемиќ Сарамандиќ – директор за Македонија и Србија, г-ѓа Алма Ќамо – директор за Албанија и г. Андреј Ѓокиќ- одговорно лице за односи со јавност.
На работилницата беше даден осврт за ниското ниво на пенетрација за осигурување на имот и природни катастрофи во земјата, како и за потенцијалните влијанија на природните катастрофи врз работата на комерцијалните банки и финансискиот систем на земјата. Беше разгледана улогата на осигурувањето од катастрофални ризици како механизам за ублажување на ефектите од катастрофалните ризици кои би можеле да ги имаат комерцијалните банки и нивните клиенти, преку примери од европските земји.
На крај беше истакната улогата на Европа Ре во подигнување на свеста на потрошувачите и бизнисите за влијанието на природните катастрофи и развојот на осигурувањето од катастрофални ризици во регионот преку осигурителен модел развиен од Европа Ре.
Потпишан Колективен договор за независни регулаторни тела
На ден 11.2.2015 година во просториите на Агенцијата за супервизија на осигурување беше потпишан Колективен договор за независни регулаторни тела што претставува потврда за довербата помеѓу социјалните партнери и уште една норма на секторско ниво која ќе придонесе за унапредување на правата и обврските од работен однос.
Договорот го потпишаа Претседателот на Синдикатот на работниците од финансиските организации на Македонија г-ѓа Светлана Петровиќ и Претседателот на Организацијата на работодавачи на Македонија г.Ангел Димитров како и Претседателот на Здружението на работодавачи од финансиската дејност и дејностите од осигурување г-ѓа Николина Миланова.
На свечениот настан присуствуваа д-р Климе Попоски, Претседател на Советот на експерти на Агенцијата за супервизија на осигурување, д-р Булент Дервиши, Претседател на Советот на експерти на Агенцијата за супервизија на капитално финансирано пензиско осигурување, претставник на Комисијата за хартии од вредност како и претставници на Синдикалните организации на независните регулаторни тела.
Седница одржана на 27.02.2015
- Годишна сметка за 2014 година на Агенцијата за супервизија на осигурување,
- Решение за давање дозвола за вршење работи на застапување во осигурување на Друштвото за застапување во осигурување ВАШ ПРИЈАТЕЛ АД Прилеп;
