На 14-ти март, 2012 година, членовите на Советот на експерти на Агенцијата за супервизија на осигурување остварија работна средба во Виена, во седиштето на Австриската Осигурителна Асоцијација.
Целта на оваа посета беше да се одржи презентација од страна на Агенцијата за развојот на пазарот на осигурување во Република Македонија во изминатиов период пред потенцијални австриски инвеститори.
Агенцијата за супервизија на осигурувањето ја одбележа двегодишнината од своето постоење со пригодна свеченост која се одржа во хотелот Стоун Бриџ, Скопје. На овој свечен настан беа поканети високи државни претставници, претставници од осигурителната индустрија и претставници од различни институции и тела со кои Агенцијата има професионална соработка.
Во своето обраќање претседателот на Советот на експерти на Агенцијата за супервизија на осигурување, д-р Климе Попоски, ги истакна достигнувањата на Агенцијата како независно регулаторно тело со основна мисија да се грижи за законско ефикасно осигурување на пазарот на осигурување со цел заштита на правата на осигурениците и корисниците на осигурителните услуги.
Исто така, г. Попоски ги истакна основните обележја на пазарот на осигурување во Р. Македонија, односно дека станува збор за мал пазар кој се наоѓа во фаза на динамичен развој, со прифатлива концентрација на субјектите, во доминанта сопственост на странски инвеститори, од кој поголемиот број брендови од Европска Унија.
Според вицепремиерот и министер за финансии Зоран Ставрески, кој присуствуваше на свеченоста, Агенцијата успеала за две години да се етаблира како професионално, независно и компетентно регулаторно тело што успешно ја остварува целта на зајакнување на стабилноста, ефикасноста и конкурентноста на пазарот на осигурување.
– Нема подобра потврда дека нашата Агенција за супервизија е на добар пат од последниот Извештај на Европската комисија за напредокот на Република Македонија во кој посебно се истакнува напредокот на пазарот на осигурување, истакна Ставрески.
Исто така, во своето обраќање, г. Ставрески најави дека Владата ќе продолжи со поддршката на Агенцијата и на развојот на пазарот за осигурување и во таа насока го спомена донесувањето на законот со кој ќе се овозможи реализација на проектот за осигурување од ризикот од катастрофи Европа Ре. Кон крајот на 2012 година ќе биде донесен и нов закон за осигурување со кој во целост ќе се имплементираат европските стандарди за солвентност на осигурителните друштва.
– Донесувањето на тој закон ќе придонесе за зголемување на довербата во финансиската стабилност во осигурителниот сектор, намалување од ризикот на несолвеност на друштвата и рано предупредување до супервизорите на пазарот на осигурување со цел навремена интервенција и спречување на подоцнежни последици, рече Ставрески.
Во рамки на прославата беше доделена награда за млад истражувачки труд од областа на осигурувањето и управувањето со ризик. Осврт кон воведувањето на оваа нова традиција даде проф. д-р Силвана Мојсовска, член на Советот на експерти на Агенцијата, при што истакна дека Агенцијата се приклучува кон трендот започнат од другите регулаторни тела, со цел да се стимулира научната мисла во областа на осигурувањето.
На Конкурсот беа пријавени 9 трудови наградата за млад истражувачки труд од областа на осигурувањето и управувањето со ризик која годинава му беше врачена на Милан Елисковски, за трудот насловен Економски детерминанти на потрошувачката на осигурувањето на живот во Република Македонија.
Исто така, на овој настан Агенцијата ја промовираше и брошурата за пазарот на осигурување чија цел е зголемување на јавната свест за улогата на осигурувањето во приватниот и општествениот живот. Брошурата содржи појаснување и дефинирање на одредени термини од областа на осигурувањето.
На истиот ден, во просториите на Европскиот Универзитет Скопје, започна и обуката за актуари во организација на Агенцијата со што во иднина ќе се овозможи добивање на потребен специјализиран кадар за потребите на осигурителната индустрија.
Во периодот од 10-11 октомври, 2011 година во Тирана се одржа втората регионална средба на супервизорите од регионот. Оваа средба беше иницирана на завршницата на првиот регионален состанок во април,2011 година кој се одржа во Виена.
Организатор и домаќин на средбата беше Регулаторно тело за финансиски надзор на Албанија. На настанот присуствуваа претставници од Агенцијата за супервизија на осигурување на Република Македонија, како и претставници од регулаторните тела на Албанија, Австрија, Молдавија, Унгарија, Црна Гора, Романија, Полска, Србија и Словачка.
Целта на оваа средба беше во насока на продлабочување на соработката меѓу регулаторните органи и институции, заради постигнување на поголема ефикасност во извршување на супервизорската функција. Главни теми на настанот беа: резервирање на штети, улогата на актуарот, дистрибуцијата на осигурувањето и критериумите за соодветност на членовите на орган на управување. Настанот предизвика продуктивна дискусија и размена на искуство меѓу супервизорите во регионот.
Првата регионалната конференција на ЕВРОПА РЕ насловенa Развој на пазарите за осигурување од невреме и катастрофални ризици во Југоисточна Европа: Од концепт до реалност ќе се одржи во х.Гранит, Охрид, од 12 до 15 октомври 2011 година.
Агенцијата за супервизија на осигурување се јавува во улога на ко-организатор на оваа конференција, заедно со ЕВРОПА РЕ, Светската банка, UNISDR (Секретаријат во рамките на ООН за меѓународна стратегија за намалување на катастрофите) и Државниот секретаријат за економски прашања на Швајцарија.
Конференцијата ќе има за цел да промовира концептот на ЕВРОПА РЕ во развојот на пазарите на осигурување од невреме и катастрофални ризици во Југоисточна Европа.
На конференцијата ќе присуствуваат високи владини претставници, претставници на регулаторни тела, осигурителни компании, како и на компании за мапирање ризици со цел да ги претстават комплексните осигурителни производи кои треба да бидат развиени во регионот на Југоисточна Европа со поддршка на Светската Банка.
Агенда и образец за регистрација тука
Агенцијата за супервизија на осигурување организираше еднодневен семинар на тема техники и можности за инвестирање и управување со портфолио.
Семинарот се одржа на 14ти септември, од 10 до 14 часот, во просторите на Стопанската комора на Македонија. Претседателот на Советот на експерти на Агенцијата, г. Климе Попоски, ја отвори средбата и им посака добредојде на учесниците. Предавачи на овој семинар беа:
– Мира Шекутковска, НЛБ Нов пензиски фонд АД Скопје, член на управен одбор, и
– м-р Горан Марковски, CFA, КБ Публикум инвест АД Скопје, главен извршен директор.
На семинарот присуствуваа одговорните лица за вложување, портфолио менаџери, како и претставници од секторите за финансии на друштвата за осигурување.
Семинарот беше организиран со цел да промовира техники и можности за инвестирање и управување со портфолио, преку доближување на искуството на друштвата за управување со пензиски фондови и друштвата за управување со инвестициски фондови како сродни институции од македонскиот финансиски систем во делот на спроведувањето на инвестициската стратегија.
На ден 21 февруари, 2011 година двете регулаторни тела, Агенцијата за супервизија на осигурување на Македонија и Комисијата за супервизија на осигурување на Романија, потпишаа Меморандум за соработка. Овој Меморандум претставува основа и отвара простор за понатамошна успешна соработка и тоа во насока на размена на искуства и информации за осигурителните пазари во двете земји, размена на знаење преку студиски посети и организирање на регионални состаноци и средби и понатамошно зајакнување на административните капацитети.
Со цел ефикасно спроведување на своите законски надлежности и активности, Агенцијата за супервизија на осигурување (АСО) континуирано вложува во заjакнување на капацитетите на супервизијата преку воспоставување и имплементација на систем на континуирана едукација и стручно усовршување на вработените. Во рамки на активностите за развој на супервизијата, се вршат редовни обуки во земјата и странство.
Во периодот од 1-4 февруари, 2011 година во Охрид, во организација на Агенцијата а во соработка со регулаторното тело на Германија-BAFIN, беше реализирана обука за супервизорите.
На ден 18 јануари, 2011 година Агенцијата за супервизија на осигурување ја продлабочи соработката со Народната Банка, со потпишување на Меморандум за соработка.
Овој Меморандум претставува добра основа и отвара простор за понатамошна успешна соработка меѓу двете институции во насока на размена на информации, знаење, искуство и зајакнување на капацитетите.
На 14 декември 2010 година, Агенцијата за супервизиуја на осигурување (АСО) и Агенцијата за супервизија на капитално финанасираното пензиско осигурување (МАПАС) потпишаа Меморандум за соработкиа.
Меморандумот како еден вид законска рамка го уредува начинот на соработка и истиот претставува основа за продлабочување на професионалните односи и јакнење на довербата меѓу двете регулаторни тела.
Чинот на потпишување на Меморандумот за соработка се случи во просториите на МАПАС и истиот беше потпишан од страна на г. Булент Дервиши, директор на МАПАС и г. Климе Попоски, претседател на АСО.
Во интерес на пратење на современите трендови во управувањето со ризиците, Агенцијата за супервизија организираше дводневен семинар со тема “Управување со ризици кај претпријатијата” – An Overview of Enterprise Risk Management (ERM). Семинарот се одржа на 24ти и 25ти ноември, од 09 до 13 часот, на Европскиот универзитет Скопје. Претседателот на Советот на експерти на Агенцијата, г. Климе Попоски, ја отвори средбата и им посака добредојде на учесниците. На семинарот присуствуваа актуари, порфолио менаџери, како и претставници од секторите за финансии на друштвата за осигурување.
Предавач на овој семинар беше реномираниот проф. Thomas A. Aiuppa, Ph.D., CPCU, од Colorado State University, Соединети Американски Држави.
Семинарот беше организиран со цел да го промовира значењето на концептот на ERМ, во контекстот на системскиот пристап, во кој е потребно е да се одредат односите меѓу поединечните ризици за да се оцени ефектот на ризикот на портфолиото, како особено значајна проблематика во осигурителната индустрија.
