Përfaqësues i Agjencisë së Mbikëqyrjes së Sigurimeve mori pjesë në Takimin Vjetor kushtuar projektit të Programit Teknik të OECD-INFE për Edukimin Financiar, i cili u mbajt nga 29 shtatori deri më 1 tetor 2026 në Jerevan, Republika e Armenisë.
Në takim morën pjesë përfaqësues të institucioneve përkatëse nga vendet e përfshira në program, me qëllim shkëmbimin e përvojave, praktikave të mira dhe politikave në fushën e edukimit financiar, përfshirjes financiare dhe mbrojtjes së konsumatorit.
Fokusi i takimit ishte në mundësitë për promovimin e njohurive financiare, inkurajimin e sjelljes së përgjegjshme financiare dhe forcimin e vendimmarrjes së informuar gjatë përdorimit të produkteve dhe shërbimeve financiare. U shqyrtuan rezultatet e anketës ndërkombëtare mbi njohuritë financiare, përfshirjen dhe mirëqenien e të rriturve, si dhe çështje që lidhen me strategjitë kombëtare të njohurive financiare, monitorimin dhe vlerësimin e tyre, borxhin e konsumatorëve, përdorimin e mediave digjitale dhe sociale në promovimin e edukimit financiar.
Veçanërisht e rëndësishme ishte pjesëmarrja e përfaqësuesit të Agjencisë së Mbikëqyrjes së Sigurimeve si panelist në sesionin kushtuar përfshirjes së subjekteve të tregut të sigurimeve në nismat e njohurive financiare. Diskutimi në panel theksoi rëndësinë e njohurive financiare dhe të sigurimeve si pjesë e edukimit financiar dhe përfshirjes financiare. Njohja më e mirë e produkteve të sigurimit, rreziqeve, mbulimit dhe përjashtimeve, si dhe e të drejtave dhe detyrimeve të policëmbajtësve mund të kontribuojë në një qëndrueshmëri më të madhe financiare dhe mbrojtje më të mirë të policëmbajtësve, përdoruesve të produkteve dhe shërbimeve të sigurimit dhe palëve të treta që pretendojnë dëmshpërblim.
Pjesëmarrja e Agjencisë së Mbikëqyrjes së Sigurimeve përfaqëson një mundësi të rëndësishme për shkëmbimin e përvojave dhe praktikave të mira, avancimin e qasjeve në fushën e edukimit financiar dhe forcimin e bashkëpunimit me institucionet përkatëse kombëtare dhe ndërkombëtare, me qëllim formimin e qytetarëve më të informuar financiarisht.
