Informacione të karakterit publik

Shkëmbimi i përvojave dhe praktikave të mira me qëllim të mbrojtjes më të madhe të të siguruarve apo poliëmbajtësve dhe ngritjen e vazhdueshme të nivelit të edukimit financiar të tyre ishin temat kryesore të diskutuara nga përfaqësues të organeve rregullatore të sigurimeve të vendeve të Evropës Juglindore, industrisë të sigurimeve dhe aktorëve të tjerë në sesionin e sotëm të organizuar nga Agjencia e Mbikëqyrjes të Sigurimeve (AMS) dhe Organizatës për Bashkëpunim dhe Zhvillim Ekonomik (OECD) me mbështetjen e Ministrisë së Financave të Mbretërisë së Holandës në kuadër të projektit për edukim financiar.

Në konferencën e sotme online me titull “Përvojat dhe praktikat” të organizuar në pesë sesione, më shumë se pesëdhjetë pjesëmarrës nga vendi dhe vendet e Evropës Juglindore i prezantuan përvojat, rezultatet e analizës së politikave, masave dhe mjeteve të përdorura nga rregullatorët e sigurimeve për mbrojtjen e të siguruarve.

U diskutuan edhe efektet e aktiviteteve për ngritjen e nivelit të edukimit financiar dhe përfshirjen e popullsisë në rrjedhat financiare në vendet e EJL-së. Në një prej sesioneve u debatua edhe për efektet e shkaktuara nga pandemia shëndetësore dhe masat e marra nga organet rregullatore për mbrojtjen e të siguruarve.

Mbrojtja e konsumatorëve, së bashku me edukimin financiar dhe aksesin në shërbimet financiare, është baza për një përfshirje më të madhe financiare. Mbrojtja e konsumatorit përfshin: ofrimin e informacionit të saktë dhe në kohë të konsumatorëve për vendimmarrje të bazuar në informacion, mungesën e praktikave të padrejta dhe mashtruese kontraktuese dhe aksesin në mekanizmat për zgjidhjen e shkeljeve të të drejtave të konsumatorëve.

Edukimi financiar dhe mbrojtja e konsumatorit, respektivisht policëmbajtësit janë aktivitete të cilave AMS i jep prioritet dhe i ndërmerr në vazhdimësi në kuadër të kompetencave të saj për zhvillimin e tregut të sigurimeve si dhe ndërgjegjësimin e publikut për rolin e sigurimeve. AMS i kushton vëmendje të veçantë inkurajimit të bashkëpunimit ndërmjet institucioneve përkatëse dhe bashkëpunimit me instancat e tjera përmes zbatimit të programeve dhe aktiviteteve arsimore për mbështetjen dhe përmirësimin e edukimit financiar te popullata. Ndërkombëtarisht, AMS merr pjesë aktive në projekte dypalëshe dhe shumëkombëshe për edukimin financiar dhe përfshirjen financiare.

AMS në bashkëpunim me rregullatorë të tjerë financiarë: Bankën Popullore, Ministrinë e Financave, MAPAS dhe KLV miratuan një strategji të përbashkët kombëtare për përfshirjen e edukimit financiar të popullatës. Ky është një dokument kombëtar strategjik që identifikon qëllimet e organeve rregullatore, njeh prioritetet për veprim dhe përcakton dinamikën, masat dhe aktivitetet për rritjen e edukimit financiar të popullsisë, përfshirjen e tyre dhe mbrojtjen e të drejtave të tyre që rrjedhin nga përdorimi i gamës së shërbimeve financiare ndër të cilat bëjnë pjesë edhe sigurimet.

Punëtori dy-ditore për monitorimin e situatës dhe harmonizimin e aktiviteteve që do të ndërmerren nga organet rregullatore dhe industria financiare, me ndihmën e partnerëve të huaj, me qëllim zbatimin e Strategjisë së parë kombëtare për edukimin financiar dhe përfshirjen financiare të popullatës.

Zbatimi i suksesshëm i Strategjisë së parë kombëtare për edukimin financiar dhe përfshirjen financiare. Për këtë, dje dhe sot, rregullatorët financiarë, në kuadër të Trupit Koordinues për Edukimin Financiar dhe Përfshirjen Financiare, së bashku me Rrjetin Ndërkombëtar të Edukimit Financiar të Organizatës për Bashkëpunim dhe Zhvillim Ekonomik (INFE-OECD) në bashkëpunim me Ministrinë e Financave të Holandës, organizuan punëtori në kuadër të programit Konstituenca dhe programi “Maniuajs” (Money Wise).

Dita e parë e punëtorisë iu kushtua zbatimit të suksesshëm të Strategjisë – “Përpjekjet e Koordinuara për Forcimin e Edukimit Financiar në Maqedoninë e Veriut”. Në ditën e dytë të punëtorisë do të diskutohen  sfidat në fushën e edukimit financiar në lidhje me shërbimet financiare digjitale.

Përveç rregullatorëve financiarë, në punëtori marrin pjesë banka, shtëpi kursimi, kompani pensionesh, shoqëri sigurimesh, ndërmjetësues në sigurime, kompani menaxhuese të fondeve të investimeve, shoqëri brokerimi, bursa, depozituesi qendror i letrave me vlerë dhe të gjithë pjesëmarrësit e tjerë në sistemin financiar, dhe më e rëndësishmja, përfaqësues të sektorit të shoqërisë civile – të të gjitha shoqatave dhe asociacioneve  që deri më tani kanë shprehur interes dhe gatishmëri për të zbatuar aktivitete në fushën e edukimit financiar dhe në mbrojtjen e konsumatorit.

“Duke pasur parasysh rëndësinë e edukimit financiar në një sistem financiar dinamik dhe novator, ekziston një nevojë e vërtetë për një qasje sistemike në zbatimin e Strategjisë së miratuar për Edukimin Financiar dhe Përfshirjen Financiare. Banka Popullore së bashku me rregullatorët e tjerë financiarë kanë një rol udhëheqës në këtë proces. Sipas rezultateve të sondazhit të fundit mbi edukimin financiar të popullsisë së rritur në Evropën Juglindore, të kryer nga OECD, Banka Popullore spikat si banka qendrore në rajonin në të cilin popullsia vendase ka më shumë besim si një institucion që ofron edukim financiar. Sidoqoftë, pjesëmarrja aktive e aktorëve të tjerë, nga sektori privat dhe civil, është veçanërisht e rëndësishme për të arritur qëllimet dhe misionin që kemi vendosur para nesh”- tha Guvernatorja e Bankës Popullore, Anita Angellovska-Bezhoska, në fjalën e saj në hapjen e këtij eventi.

Në hapjen e punëtorisë foli edhe zëvendësministri i Financave, Dimitar Kovaçevski.

“Pandemia në dy vitet e fundit ka vendosur synime të reja për ne. Investimet në arsim pa dyshim duhet të jenë me interesin më të madh për shoqërinë. Nëse duam të arrijmë rritje gjithëpërfshirëse, duhet të investojmë në kapitalin njerëzor, arsimin dhe përmirësimin e kualifikimeve. Investimet në kapitalin njerëzor kontribuojnë në aftësi më të mira, rritjen e produktivitetit dhe rritjen e përshpejtuar ekonomik, si dhe në zvogëlimin e varfërisë dhe pabarazisë,” tha zëvendësministri Kovaçevski, duke shtuar se vetëm me përpjekje të përbashkëta mund të kontribuojmë në krijimin e një shoqërie më të arsimuar.

“Besoj fuqimisht se nëse konsumatorët potencialë të shërbimeve të sigurimeve janë të arsimuar mirë dhe kanë njohuri të mjaftueshme për të identifikuar dhe shprehur qartë nevojat e tyre të sigurimit, hapësira për interpretime në anën e ofrimit të shërbimit të sigurimit do të ngushtohet ndjeshëm, kështu që do të ulet ndjeshëm edhe pakënaqësia dhe numri i ankesave apo ankimimeve. Edukimi në anën e kërkesës, respektivisht për konsumin e shërbimeve të sigurimeve duhet të bëhet nga të gjithë faktorët e tregut ose të shoqërisë”, theksoi Kërste Shajnoski, Kryetari i Këshillit të Ekspertëve të AMS-së .

“Bota moderne e financave – e globalizuar, novatore dhe plot informacion, ofron një sërë mënyrash formale të edukimit financiar individual. Megjithatë, rezultate më të mira mund të arrihen me një qasje apo akses institucional. Kështu, shoqëritë kanë nevojë për një akses të koordinuar dhe aktiv edhe ndaj niveleve më të larta të edukimit financiar. Kodi i ri i Praktikave të Mira për Edukimin Financiar i orienton programet dhe aktivitetet e edukimit financiar që do të hartohen dhe zbatohen si mjete për të rritur edukimin financiar dhe mbrojtjen e konsumatorëve të shërbimeve financiare. Kjo bëhet me shpresën se programe dhe aktivitete të tilla do të lehtësojnë marrjen e vendimeve më të mira në lidhje me përdorimin dhe menaxhimin e shërbimeve financiare dhe menaxhimin e rrezikut, duke zbutur kështu efektet e mundshme negative. Kodi do të vendosë të gjitha parimet që do të zbatohen me zbatimin e Strategjisë kombëtare për edukimin financiar të popullsisë në vendin tonë nga sektori publik, privat dhe civil të cilët do të përfshihen në këtë aktivitet. “- tha Kiril Jovanovski, komisioner në Komisionin e Letrave me Vlerë.

Nga Agjenscia për Mbikëqyrjen e Finansimit Kapital të Sigurimit Pensional në hapjen e punëtorisë foli, Darko Sazdov, anëtar i Këshillit të Ekspertëve të MAPAS.

“Në trendet e reja ekonomike, kur shërbimet- fintek janë gjithnjë e më shumë pjesë e realitetit tonë, ekziston një nevojë në rritje për transformimin e sistemeve dhe dixhitalizimin e tyre, kështu që një nivel më i lartë i edukimit financiar do të jetë një parakusht themelor për rritjen e të kuptuarit të sistemit të pensioneve dhe produkteve pensionale. E gjithë kjo nënkupton nevojën për përkushtim më të madh ndaj aktiviteteve të mbrojtjes së konsumatorit. Si rregullator financiar, ne jemi të përfshirë në mënyrë aktive në procesin e përgjithshëm, veçanërisht në pjesën për mbrojtjen e anëtarëve aktualë dhe të ardhshëm të sistemit të pensioneve dhe analizën e nevojës për të përmirësuar rregulloren ekzistuese dhe harmonizimin e saj me standardet evropiane në këtë fushë. Në këtë fushë, një sfidë e veçantë për ne është vendosja e mbikëqyrjes së praktikave të biznesit të subjekteve pensionale me një fokus të qartë në mbrojtjen e të drejtave të anëtarëve të fondeve pensionale duke rritur transparencën e sistemit, afatin dhe saktësinë në paraqitjen e rezultateve të sistemit, pra ofrimin e shërbimit dhe produktit më të mirë për klientin. “- theksoi Sazdov.

Nga Ministria holandeze e Financave theksuan se pandemia dëshmoi edhe një herë rëndësinë e qëndrueshmërisë financiare për qytetarët.

“Ata që janë financiarisht të cënueshëm janë të parët që preken nga pasojat ekonomike të pandemisë. Edukimi financiar është një nga elementët më të rëndësishëm në përmirësimin e qëndrueshmërisë financiare të familjeve. Gjëja më e rëndësishme është të bashkëpunojmë në mënyrë që të ndihmojmë, veçanërisht qytetarët e cenueshëm financiarisht. Ne mund të arrijmë shumë së bashku dhe të mësojmë nga njëri -tjetri. Si Ministri e Financave të Holandës, ne kemi privilegjin të jemi organizatorë  të platformës “MoneyWise”.

Kjo platformë është bashkëpunimi i vetëm midis shumë aktorëve të ndryshëm që synon të përmirësojë kapacitetin financiar të qytetarëve holandezë. Ministria gjithashtu ka krijuar një program për bashkëpunim teknik me vendet e Konstituencës sonë në FMN, Bankën Botërore dhe BERZH. Në projektin tonë me OECD, “Maniuajs” dhe Programi për Konstituencë i Ministrisë së Financave janë bashkuar për të mbështetur vendet nga Konstituenca në përforcimin e edukimit financiar, siç na tregojnë sot palët e interesuara në Maqedoninë e Veriut.” – u theksua në këtë evend nga përfaqësues të Minisitrisë holandeze.

Sipas OECD-së, vendi duhet përgëzuar për miratimin e Strategjisë së parë kombëtare për edukimin financiar dhe përfshirjen financiare dhe Kodin e Praktikave të Mira për Edukimin Financiar.

“OECD me kënaqësi ka dhënë mbështetje për zhvillimin e këtyre nismave të rëndësishme, të cilat dëshmojnë për angazhimin afatgjatë për edukimin financiar dhe përfshirjen financiare të të gjithë palëve të interesuara kombëtarë dhe në veçanti të Bankës Popullore,” u theksua në hapjen e punëtorisë.

Në punëtori, u prezantuan rezultatet e sondazhit të fundit mbi edukimin financiar të popullatës madhore në Evropën Juglindore (2020), të kryer nga INFE-OECD, me një theks të veçantë në rezultatet për vendin tonë. Në këto rezultate evidentohen sferat në të cilat në periudhën e ardhshme do të intensifikohen aktivitetet për avancimin e njohurive financiare të popullatës, ku do të zbatohen qasjet më relevante dhe metodat më moderne të rekomanduara nga OECD. Në kuadër të eventit, u krye një sondazh online për të gjithë pjesëmarrësit, për nivelin e gatishmërisë së tyre dhe nevojës së përfshirjes në edukimin financiar në vend.

Gjatë ditës së djeshme, një sesion i veçantë iu kushtua aspektit kyç – përfshirjes së sektorit privat dhe shoqërisë civile në aktivitetet e edukimit financiar, ku u diskutua lidhur me rekomandimet dhe udhëzimet e INFE -OECD në këtë fushë dhe zbatimin e tyre adekuat në kontekstin lokal, në kuadër të Kodit të Praktikave të Mira, i cili u miratua kohët e fundit nga rregullatorët financiarë në vend.

Përfshirja financiare dhe mbrojtja e konsumatorit do të jenë temat që do të diskutohen sot në punëtori. Kështu, një theks i veçantë do t’i kushtohet mbrojtjes së konsumatorëve financiarë në epokën digjitale dhe do të paraqiten udhëzimet për politikat e INFE-OECD, me theks të veçantë në pritjet e rregullatorëve financiarë. Vëmendje e veçantë do t’i kushtohet tendencave të vërejtura gjatë pandemisë kovid-19, të cilat përshpejtuan procesin e digjitalizimit. Sesione të veçanta do të mbahen mbi rolin e edukimit financiar dixhital në mbështetjen e përdoruesve të shërbimeve dhe produkteve financiare dhe mbi praktikat e mira të edukimit financiar për popullatën për shërbimet financiare digjitale.

Përvojat dhe pikëpamjet e shkëmbyera, me pjesëmarrjen aktive të ekspertëve nga INFE-OECD dhe nga Holanda, do të kontribuojnë më tej në zbatimin e suksesshëm të Strategjisë së parë kombëtare për edukimin financiar dhe përfshirjen financiare, e cila u miratua në korrik të këtij viti dhe u zhvillua në kuadër të një projekti rajonal i koordinuar nga INFE-OECD dhe Ministria e Financave e Holandës. Zbatimi i tij tashmë ka filluar, dhe ndër të tjera, kohët e fundit u miratua edhe Kodi i parë i Praktikave të Mira për Edukimin Financiar.

Sistemi financiar është në gjendje të mirë dhe është gati të përballojë sfidat e ardhshme. Ndërlidhja ndërsektoriale e segmenteve institucionale të sistemit dhe mundësia që rreziqet të përhapen nga një segment në tjetrin janë të ulëta. Është jashtëzakonisht e rëndësishme për ekonominë maqedonase që të gjithë treguesit që janë në dispozicion të tregojnë se secili nga segmentet institucionale të sektorit financiar vendas po përballet mirë me rreziqet e pandemisë. Gjithashtu është thelbësore që sistemi bankar t’i përgjigjet në mënyrë adekuate sfidave të krizës dhe të konfirmojë qëndrueshmërinë e tij ndaj goditjeve, duke qenë se stabiliteti i tij kushtëzohet nga stabiliteti i sistemit të përgjithshëm financiar.

Këto janë disa nga përfundimet nga seanca e sotme e Komitetit të Stabilitetit Financiar, në të cilin u prezantua Raporti i Stabilitetit Financiar 2020, i miratuar së fundmi nga Këshilli i Bankës Popullore. Seanca u drejtua nga Guvernatorja e Bankës Popullore, Anita Angelovska-Bezhoska, ndërsa kanë marrë pjesë Ministri i Financave, Fatmir Besimi, Kryetarja e Komisionit të Letrave me Vlerë (KLV), Nora Aliti, Kryetari i Këshillit  të Ekspertëve të Agjencisë për Mbikëqyrjen e Finansimit Kapital të Sigurimit Pensional  (MAPAS), Maksud Ali dhe Kryetari i Këshillit të Ekspertëve të Agjencisë për Mbikëqyrjen e Sigurimeve (AMS), Kërste Shajnoski.

Duke iu referuar treguesve për sistemin bankar, Guvernatorja Angelovska-Bezhoska vuri në dukje se për shkak të një vlerësimi më të hollësishëm të rreziqeve dhe gatishmërisë së sektorit bankar për t’u përballur me goditjet në kushtet e veçanta pandemike, Banka Popullore  e zgjeroi kuadrin për stres-test të sistemit.

“Përveç testit të rregullt makro-stres, për herë të parë ne kemi kryer një stres-test individual gjithëpërfshirës dhe të qëndrueshëm për secilën bankë. Rezultatet e stres-testit, sipas të dyja akseseve, treguan se shtresat mbrojtëse të kapitalit, të ndërtuara nga sistemi bankar në periudhën e mëparshme, ofrojnë mbrojtje adekuate të rrezikut dhe lejojnë rritje të mëtejshme të mbështetjes së kredisë, si për individët ashtu edhe për sektorin korporativ”, theksoi guvernatorja.

Ajo vuri në dukje se është me rëndësi të madhe që pavarësisht sfidave të pandemisë dhe pas përfundimit të shtyrjes apo vonesës së arkëtimit  të kredive, niveli i kredive me probleme është ende i ulët.

Në seancë u theksua se Ministria e Financave monitoron vazhdimisht situatën në segmentin e sistemit financiar për të cilin është përgjegjëse, domethënë kompanitë financiare dhe kompanitë e lizingut. Gjegjësisht, vitin e kaluar ky sektor u prek nga pandemia Kovid-19, por që nga fillimi i vitit ai tregon rimëkëmbje dhe rezultate pozitive, si duke rritur numrin e kompanive që operojnë në treg ashtu edhe në plasmanet apo shitjet financiare.

“Forcimi i pozicionit të tregut nga kompanitë financiare në periudhën e kaluar është një shtysë shtesë për të menduar më seriozisht për kërkesat dhe standardet rregullatore që duhet të përmbushen nga kompanitë financiare. Për këtë arsye, Ministria e Financave po shqyrton mundësinë e forcimit të kuadrit rregullator për funksionimin e kompanive financiare në treg në Republikën e Maqedonisë së Veriut, në mënyrë që të theksohet serioziteti dhe aksesi i tyre për të punuar nga njëra anë dhe për të rritur besimin e opinionit dhe  të kompanive në këto institucione financiare”, theksoi Ministri i Financave, Fatmir Besimi.

Ai shtoi se kjo është e nevojshme sepse kompanitë financiare duhet të shihen si institucione financiare serioze që ofrojnë një alternativë ndaj bankave dhe jo vetëm si kompani që ofrojnë kredi afatshkurtra për familjet.

KLV-ja vazhdon të monitorojë në mënyrë të vazhdueshme, si në të kaluarën, tendencat dhe rreziqet e mundshme, për shkak të përgjigjes së duhur e që synon kryesisht pjesëmarrësit e tregut, infrastrukturën e tregut, mjedisin e tregut, përfshirë transparencën, menaxhimin e mirë korporativ dhe interesin për investime.

“Misioni i tregut të kapitalit në periudhën pas shpërthimit të pandemisë Kovid-19 ka për qëllim njohjen e ideve dhe projekteve pozitive që forcojnë aktivitetin e bursës dhe të fondeve, duke motivuar kështu shoqëritë aksionare dhe të gjitha subjektet e tjera që kanë një potencial të fortë për përparim për të investuar në inovacion dhe zhvillim përmes tregut, sepse vetëm trendet pozitive mund të kontribuojnë në parametra edhe më të mirë ekonomikë”, theksoi kryetarja e Komisionit të Letrave me Vlerë, Nora Aliti.

Tregu i kapitalit  po përjeton stabilitet, në të gjitha aspektet e tij, i cili është konstant dhe i dukshëm, i cili, nga ana tjetër, është rezultat i aktiviteteve të KLV-së. Duke u nisur nga sublimati i realizimit të tregut të letrave me vlerë, në vitin që ishte jashtëzakonisht i pasigurt për të gjithë, u shënua progres në segmente të caktuara, që është përmendur edhe në Raportin e Stabilitetit Financiar të vitit 2020.

Siç u theksua në seancë, edhe në kushtet e krizës me sfida të reja, Komisioni arrin të veprojë intensivisht, si një rregullator proaktiv dhe të ndërtojë një treg kapital më rezistent ose më të qëndrueshëm.

Kryetari i Këshillit të Ekspertëve të MAPAS, Maksud Ali, vuri në dukje se kriza globale shëndetësore dhe ekonomike i zhvendosi për një periudhë afatshkurtër tendencat rritëse në parametrat e sigurimit të detyrueshëm dhe vullnetar të kapitalit pensional, kështu që ka ndryshime në rënie në fund të tremujorit të parë të vitit 2020, por megjithatë fondet e pensionit në një kohë relativisht të shkurtër e kthyen dhe e tejkaluan vlerën e reduktuar të aktiveve.

“Sidoqoftë, duke pasur parasysh që fondet e pensioneve janë investitorë afatgjatë, është e rëndësishme që ato të vlerësohen në afat më të gjatë. Në periudhën shtatëvjeçare 2014-2020, rendimenti mesatar i realizuar në baza vjetore është brenda nivelit të planifikuar strategjikisht”, tha Ali.

“Politikat konservative të shoqërive të sigurimeve dhe rregullativa për ushtrimin e veprimtarisë së sigurimeve e cila i referohet vlerësimit të provigjoneve teknike dhe investimeve të fondeve apo mjeteve që mbulojnë provigjonet teknike, si dhe cilësisë së lartë të instrumenteve të përfshira në llogaritjen e kapitalit të shoqërive të sigurimeve janë bazë dhe garanci e mirë për ruajtjen e aftësisë paguese në aktivitetin  e shoqërive të sigurimeve. Në gjysmën e parë të vitit 2021, pati një rritje të sigurimit në të dy grupet, jo-jetë dhe jetë. Numri i shoqërive të sigurimeve nuk ka ndryshuar, por ka një rritje të konkurrencës në ofertën e shërbimeve të sigurimit në të dy segmentet, gjë që çon në një rritje të konsiderueshme të shpenzimeve, respektivisht një rritje të pagesave të dëmeve dhe shpenzimeve operative të aktivitetit, që kontribuon në zvogëlimin koncentrimit të tregut, por edhe për përkeqësimin e rezultateve financiare në gjysmën e parë të vitit”, citoi ndër të tjera, Kryetari i Këshillit të Ekspertëve, Kërste Shajnoski.

Në seancë u theksua se është jashtëzakonisht e rëndësishme që përkundër efekteve të theksuara të pandemisë, rreziqet që lidhen me sektorin “amviseri” janë brenda kornizave dhe borxhi apo debia  e amviserive mbetet e moderuar. Në të njëjtën kohë, është e rëndësishme që amviseria  e ruajti aftësinë për të shlyer borxhin rregullisht, gjë që kontribuoi në ruajtjen e cilësisë së portofolit kreditor të huave të bankave. Borxhi i sektorit korporativ është rritur mesatarisht në vitin 2021, por ai edhe më tej mbetet i moderuar. Në fakt, edhe gjatë pandemisë, sektori korporativ e rriti kapitalin e tij, i cili kontribuoi në rritjen e financimit të borxhit, pa rritur nivelin e borxhit/debisë të shprehur si raporti midis borxhit dhe kapitalit (leverixhi financiar). Duke pasur parasysh që pandemia është burimi kryesor i rreziqeve për sektorin e korporatave në periudhën e ardhshme, në seancë u theksua se rreziqet janë më të theksuara për subjektet me nivele më të larta të borxhit dhe atyre që nuk do të jenë në gjendje të rregullojnë kushtet e funksionimit të imponuara nga pandemia.

Duke parë të dhënat për të gjitha segmentet institucionale të sistemit financiar, u arrit në përfundimin se ai është gati t’i përgjigjet sfidave të ardhshme. Në këtë kontekst, duke pasur parasysh faktin se ka ende pasiguri në lidhje me rrjedhën e pandemisë dhe efektet e mundshme të mëtejshme në ekonomi, pritet që të gjitha institucionet financiare të vazhdojnë të veprojnë me kujdes dhe të mbajnë nivele adekuate të kapitalizimit dhe likuiditetit.

Nënkomitetet në kuadër të Komitetit të Stabilitetit Financiar monitorojnë rregullisht situatën, në mënyrë që koordinimi i rregullatorëve financiarë të jetë konstant.